Ons Jabeur hi August 28, 1994-a Samira leh Ridha Jabeur nupa inkara Tunisia khaw te tak te, Ksar Hellal-a piang a ni a. A pianna khua te mah se vaukam khaw lian zawk, Sousse-a sei lian a ni.

Jabeur-i hian unau mipa pahnih - Hatem leh Marwen leh hmeichhia, Yasmine a nei a. A nu hian intihhlim nan tennis hi a khel thin a, kum thum mi lek a nih atangin a hmelhriat tan phah a ni.

Jabeur-i hi coach Nabil Mlika hnenah kum 10 zet, kum li a nih atanga kum 13 a nih thlengin a inzir a, hetih lai hian an sikulah tennis promotion centre awmin a inzir thin a ni.

Kum 10 mi a nih laiin an club chuan tennis court pawh an nei lo va, an thenawm hnai khualbuka court-ah a khel mai thin a. Kum 12 a nihin Jabeur-i hian an khawpui, Tunis panin Lycée Sportif El Menzah-ah a inzir tan ta a ni.

A hnuah erawh chuan Belgium leh France lamah a kal a, kum 16 a nih atangin ram pawnah a inzir ta a. A nu leh pa lakah a inkhelhnaah kawngah hian lawm thu a sawi nasa hle thin.

Tunah hian Tunisian professional tennis player niin a inkhelh ve tawh china a tawn san lai ber, Women’s Tennis Association (WTA) ranking-ah No. 14 a kai mek a, hei hi October 4, 2021-a a thlen kha niin No. 1 African player a ni mek a. Arab tennis player zinga ATP leh WTA ranking-a tawng sang ber a nihrual chiah a, Younes El Aynaoui khan World No. 14 dinhmun chu ATP ranking-ah kum 2003 leh 2004 khan a lo ni tawh a ni.

2020 Australian Open-ah khan Arab hmeichhe zinga Grand Slam-a quarterfinals thleng hmasa ber a ni a. 2021 Wimbledon Championships-ah pawh a thleng zui leh bawk.

Jabeur-i hian ITF Circuit-ah singles title 11 leh doubles title pakhat a la tawh a. WTA final vawi hnih a thleng tawh a, pakhat zawk hi Russia-a Premier-level 2018 Kremlin Cup-ah a ni nghe nghe.

A naupan laiin Jabeur-i hian junior Grand Slam girls' singles finals vawi hnih, French Open-ah ve ve, kum 2010 leh 2011 khan a thleng a, a hnuah chuan a champion ta nghe nghe.

Arab player zingah kum 1964-a Ismail El Shafei-an Wimbledon boys’ title a lak hnua Grand Slam singles title la leh hmasa ber a ni a. ITF level-a kum 10 vel a khelh hnuah Jabeur-i hi kum 2017 khan WTA Tour-ah zuang lutin khawvel hmelhriat a hlawh mek zel.