Aizawl March 16, 2024 : Sihphir Venghlun-in a vawi khat nan final lut thei turin rahbi an tuk a, zirtawpni zan Mahindra XUV3OO LPS Cup semifinal first leg-ah goal hnih goal khatin Bethlehem Vengthlang an hneh.

Rajiv Gandhi Stadium, Mualpuiah team pahnihin an tihsual avangin goal an chhuah ve ve a, tawiawmtu mipui ngah zawh Bethlehem Vengthlang goalkeeper Malsawmsanga'n khelh thum goal a venhim hnuah tum hnih a che sual.

Chawlhlawk hma chiahin Lalmuansanga'n a khung bakah hun tawp hma lawkin Malsawmtluanga'n Sihphir Venghlun chak nan a thun ve leh a; defender Lalruatsanga'n a tihsual avangin Lalbiakmuana'n second half tan tirah Bethlehem Vengthlang tan a pet lut bawk a ni.

Semifinal-a an inlan vawi khatnaah Sihphir Venghlunin si khata hmahruai chungin thawhtanni zan second leg-ah 2016 champion Bethlehem Vengthlang an khelhpui leh dawn a, hamthatna nei sa chungin khelmualah an lut dawn a ni.

Minute 10 an inkhelh hmain Lalmuanpuia'n Lalnunsanga siamsak atangin a tauh lut teuh hle a, a nat tawk loh avangin Bethlehem Vengthlang defender Remlalfak'n goal line hma atangin a tauh chhuak.

First half a tawp dawn hma chiahin Nunsanga'n ball vawrhin man mai theih tura ngaih a nih laiin Sawmsanga'n a thlauh a, Muansanga'n su lutin tournament kal meka Bethlehem Vengthlangin goal an chhuah hmasak ber a ni.

Second half tan a nih rualin centre-back Ruatsanga'n an lamah a tauh sual a, Bethlehem Vengthlang substitute Biakmuana'n um falin keeper Zoliansanga dan theih lovin a pet lut a, hlim thawm a tha hle.

Hun pangngai tawp nan minute 11 a la awm tihin Sihphir Venghlun tan tournament kal meka goal ruk thun tawh leh khung tam ber Ricky Lalramnghaka'n freekick a pet a, Sawmsanga'n man pialin goal kham a per.

Minute 90-ah PC Ruatsanga'n ding lam sir atanga freekick a pet chu Sawmsanga'n zuanin a ban pha lo va, Liansanglura'n a dan rem hnuah Malsawmtluanga'n hnai tak atangin awlsam takin a pet lut a ni.

Hun tawp hma chiahin Bethlehem Vengthlang si phurh sut thei turin Lalremsanga'n hun tha a nei a, F Lalrochhuanga'n tha takin a vawrh a, hnai tak atangin tibuaitu awm lovin goal zawn lovah a dang chhuak a ni.

BETHLEHEM VENGTHLANG LC 1-2 SIHPHIR VENGHLUN VC

⚽BVT : Lalbiakmuana 46'

⚽SV : Lalmuansanga 45+3' Malsawmtluanga 90+3'

Divya player of the match : Malsawmtluanga (J. No 13, Sihphir Venghlun )

Match Stats :

Possesion : 56-44

Attempt : 15-20

On Target : 6-10

Corner : 2-9

Offside : 2-1

Foul : 12-7

Yellow card : 2-1

Red card : 0-0