ZALEN, August 27, 2025: KTP Zotlang Branch, Aizawlin kumina an branch project atana an neih, an kohhran biak in sak mek puala Kristian film an siam, ‘Dar 10’ tih chu Zirtawpni zan hian an tlangzarh dawn.

Presbyterian Kohran, Zotlang hian an biak in thiatin a thar an sa mek a, hemi atana sum tuak nan an branch KTP hian kuminah film siam ni se an tih angin ‘Dar 10’ hi an siam.

Zirtawpni zan dar 08:00 hian Auditorium & Cultural Centre, Vaivakawn, Aizawlah tlangzarha chhuah a ni dawn a. Lersia Play-ah en theih turin an chhawp chhuak zui dawn a ni.

‘Dar 10’ movie-ah hian Kristian chhungkaw pangngai tak anga langah rualawhna avanga miin tha lo tih a hriat reng a tihluih avanga buaina thuk zawka a luh dan te, tun lai Mizorama vantlang titi luah tak pakhat, ‘hausak thutna’ kaihhnawih bakah nula tlangval inngaihzawnna, phuba lakna pawh tihlan a ni dawn a ni.