Infiamna

Biakkima inhnek kan hmu dawn ta

Admin - Apr 13, 2021

Mizo boxer hmuhnawm ber pakhat, LPS Pro Fight a tum nga zet a zawna champion thei NT Lalbiakkima'n International Boxing Association intercontinental title a chuh dawn

Hlawhtling taka LPS Fight Night an buatsaih hnuah thla leh May 7 hian R. Dengthuama Indoor Stadium, Mualpui-ah LPS Fight Night 2 buatsaih leh a ni dawn a, he hunah hian Mizo boxer hmuhnawm ber pakhat, LPS Pro Fight a tum nga zet a zawna champion thei NT Lalbiakkima'n International Boxing Association intercontinental title a chuh dawn.

Anni pahnih bakah hian Mizo boxer Khuangthing fighter Vanlalawmpuia te, Cherhlun tlangval Zoramchhana te, Mualpui boxer C. Lalhruaitluanga te leh Chawngtlai fachuam HC Lalramfela te an inlan bawk ang. Mizo boxer te bakah hian Marine Boxing Promotion hnuaia mi Indian boxer dang an tel bawk ang.  Indian boxer pahnih Vimal Punera leh Hans Raj te chuan IBA Asian title inchuhin flyweight huangah an inhnek bawk ang.

Zo Keite a che dawn e! 
A hming lama 'Zo Keite' an tih Biakkima chuan hun rei tak a nghah hnuah nikum December 20 khan Mumbai-ah a vawikhat nan professional boxing a khel a. Awlsam takin round khat pawh hmang zo lovin technical knockout-in a tumpui pa a tlawm thei. Amah buaipuitu Marine Boxing Promotion chuan April 17, 2021-ah Mumbai-ah IBA Intercontinental title chuhtir tumin ruahmanna an siam fel vek tawh a, hma lakna thui tak an kalpui hnuah Covid-19 hri leng nasa vangin inhnek buatsaih theih a ni ta lo a, Marine Boxing Promotion chuan LPS Fight Night buatsaihtute dawrin inremna an siampui ta zawk a ni. Ruahmanna hmasa lang lo Mizo boxer dang pali tan inhnek theihna kawng a inhawn phah ta bawk. 

Siaha fighter tha Biakkima hi boxer lar Lalmuanpuia’n a hrual a, kumin kum tir atang khan intercontinental title chuh tur hian ngawr takin inpuahchahna an kalpui tawh a ni. Professional huanga weight zang berah a khel a, boxer an tam loh avangin Biakkima tan title chuh mai theihna kawng a inhawng a, vawihnih a inhnekna tur chauh ni mah se kawnghren a la thei nghal dawn a ni. 

A inhnekpui tur Sandeep pawh hian tawn hriat a nei tam bik lo.  Tum hnih a inhnek a hmachhawn tawhah ala tlawm lo a ni. Nikum hmasa November 1 khan professional boxing luhchilhin Biakkima hneh tawh Aman-a lakah majority decision-in a chak a, November 16-ah inhnek zui leh nghalin Amit nen an inhnehtawk.
Neeraj a knockout tumtu Awmpuia

Super Lightweight huangah Awmpuia chuan a vawithum nan fight a hmachhawn dawn a, tum hnih knockout hmangin alo chak tawh a ni. Boxer inringtawk leh hnek na hian Neeraj-a lakah a thiamna lan tirin a KO thei a ngem? 

Chandawali boxer Neeraj hian professional boxing vawili a khelah tum hnih chakin vawihnih a tlawm. Nikum kumtawp khan TKO hmangin Sourav-a’n a hneh a ni. 
Zotea a rawn ding chhuak    leh

Super Bantamweight huangah Zotea'n professional boxing a khelh hmasak berah mit a tlung a, amah aia tawn hriat nei tha Mazhar Hussain-a lakah a dingchang. Hussain khan Zotea ahmachhawn hma khan fight vawihnih hmachhawn tawhin a chak thei ve ve a ni. Cherhlun boxer hmaah erawh a professional huanga a vawi khat nan a tlawm a nih kha.

A beih tur Aman hian professional boxing tum 6 khel tawhin a chak lo vek a, hei vang hian Zotea tan beisei a sang hle a ni. 

Inpuahchahna tha nen Ramfela’n fight a hmachhawn dawn 
Lightweight LPS Pro Fight bantamweight champion hlui Ramfela hian thla kal ta khan chawp chilh takin professional a luhchilh a, ni riat a la awm tihin a inhnekna tur tihfel a ni. Chuti chungin Rohit Choudhary-a lakah thiamna lantirin chiang takin a chak. 

A tumpui tur Inderjeet hian professional boxing vawili a khel tawh a, chak vekin mi pakhat a knockout.A khelh hnuhnunah Inderjeet hian hma a sawn tih lantirin nikum December ni 20 kha a fight hmuhnung berah technical knockout hmangin Sachin Mandhotra a hneh a, tun tumah hian vawi 5 chak zawn tumin Mizoram a pan dawn a ni.

Hruaia hian a professional a khelh hmasak berah DR Congolese boxer Emmanuel Ngindu chu unanimous decision-in a hneh.  Tun tumah hian Mualpui tlangval hian amah aia tawn hriat nei tha Kamal Kant chu Super Welterweight huangah a hmachhawn dawn a ni. Kant hian fight vawili  hmachhawn tawhin tlawm nei lovin tum thum a chak. December 20, 2020 kha Kant-a inhnek hnuhnun ber niin Paras Kumar lakah unanimous decision-in a chak a, hemi kum tho March 6 khan Karan nen an inhnehtawk a, professional huanga a chak zawh loh awm chhun a ni.