Biate khuaah THINGPUI KUT :: Khaw mipui 70% in thingpui an ching Aizawl; Biate khua chuan February ni 21,2014 hian 'Thingpui Kut' ropui taka hman an tum a, Kut denchhen hian Biate khawchhuak zinga MLA, Minister leh MP lo ni tawh mi 7 te hnenah chawi-mawina pek an tum a. Anni bakah hian Biate-a thingpui chin bul lo tantu Sailo lal, Thangchuanga chhungte hnen-ah te, Biate-a thingpui khawl buntu Lalthanpuia hnenah leh thingpui chingtu hlawhtling C.Lalramzauva hnenah te chawimawina pek an tum bawk. Thingpui Kut hman an tum chungchang hi sawifiahin nimin khan Aizawl Press Club ah Kut Organising Committee hruaitute chuan chanchinbumite an kawm a, Biate khua In 500 chuang zet zingah thingpui chingtu chhungkua 350 (70% vel) awmin thingpui ngawr ngawra eizawng chhungkaw 120 vel an awm niin an sawi a, tun dinhmun-ah thingpui kung nuai 34 vel zet Biate-ah chin a ni tawh a, chin belh mek zel a ni, an ti. Thingpui chingtuten awlsam taka an hralh theihnan Biate pa, tuna Mission venga cheng mek Pu Lalthanpuia chuan thingpui khawl lian tak ‘Samuel Tea Factory’ chu kum 2012 khan a din a, ama sum nuai 400 a sen bakah NLUP sum hmangin Factory hnenah hian nuai 57 zet chu pung awm lovin puk tir a ni a, hei vang hian thingpui pawh mumal taka her theih a nih phah niin an sawi bawk. Thingpui Kut huaihawttute chuan Samuel Tea Factory hian ni khat Thingpui zik (a hring), Quintal 5000 zet an her thei nain, tunah chuan kan tharchhuah tawk quintal 500 vel chauh nikhatah an la her a ni, an ti a. Factory hian Thingpui zik hi kg 1 Rs. 12 in mipui hnen atang-in a lei thin a ni an ti. Biate khua in thingpui chin kawnga hlawhtlinna hmel a hmuh theihna chhan hi Congress leh MNF sorkar bakah Tea Board of India tanpuina avang niin an sawi a. "Thingpui chin kawnga hlawhtlinna hmel kan hmuh mek lawmawm kan tih vang te, Mizo tharchhuah ngei thingpui vawrh lar zel a nih theihna atan te, Biate khua mai bakah khaw thenawm thlenga thingpui chin kawnga hmathar kan lak zel theihna tura infuihtharna atan leh thingpui khawl (factory) official-a hawn nghalna remchang atan ‘Thingpui Kut’ hi buatsaih kan tum ta a ni," tiin Kut ah hian Minister Zodintluanga chu khuallian a ni dawn niin an sawi.

• Biate ah hian kum 1935 vel atangin thingpui an lo ching tan tawh.
• Biate khuaa thingpui ching chhungkaw 350 zinga 177 chu Tea Board of India hnuaiah an inziaklut tawh.
• Thingpui Kut hmanna atan hian NLUP Implementing Board chuan cheng nuai 3.65 a pe a ni.
• Kum 2012 ah Thingpui qtls. 37500, 2013 ah qtls. 85000 tharin 2014 ah qtls 1,00,000 thar beisei a ni.
• 2012 & 2013 chhungin Samuel Tea Factory hian thingpui atangin nuai 12.5 a leichhuak.