Premier League-ah hian big 4 tih ngam club lian pali an awm thin a, tun hnaiah erawh an tiatpui dang club pahnih awm belhin paruk an ni ta a, big 6 tia hriat an hlawh chho leh tawh. 

Chung big 6 kan tih club lian parukte chu; Manchester City, Liverpool, Chelsea, Manchester United, Arsenal leh Tottenham te an ni a, nizanah Spurs tih loh team dang panga te hian match an nei vek a, an chak vek bawk.

Dan rual loh Haaland
Tun nipui transfer chhunga thawm nei lian ber pakhat Haaland chuan a leitute mit tlung takin a khel chho zel a, a goal thun thin dan pawn a la theihnghilh lo tih lantirin hat-trick a siam.

Inkhelh tan atanga minute 4-na lekah City hian Stones-a own goal hmangin si an phur nghal a, minute 21-naah Andersen-a hmangin Crystal Palace-in an goal hnihna an thun leh. Ball chang tam zawk City-in goal an thun mai thei lo. An talbuai lek lek hman a, chawlhlawk a nih thlengin goal an thun thei lo va, chawlhlawk hamrik a rikin mikhual Crystal Palace lamin si hnih faiin hma an hruai.

Second half-ah Manchester City an harh chhuak ve thung a, beiseina sang tak nena an player lakluh thar Haaland chu beisei ang ngeiin an tal ta a, Palace defendr tan dan rual a ni lo. Second half-ah City hian Erling Haaland-a hat-trick leh Bernardo Silva goal khat hmangin goal 4 an thun a, hun a tawp meuh chuan 4-2 zetin Manchester City hian an lo lehthal hman der.

Arsenal laipuiin an sai fuh zel rih
Arsenal chuan an mual Emirates Stadium-ah Fulham an lo mikhual a, 2-1 in an chak. 

Tun season-ah Arsenal hian match 4 khel tawhin an la chak vek a, point 12 neiin hmahruaitu an ni mek. He inkhelah hian Aleksandar Mitrovic hmangin Fulham lamin hma an hruai a, mah se Arsenal tan Martin Odegaard leh Gabriel-te rawn che chhuak vein goal khat ve ve an rawn thun a, premier league hmahruaitu leh mual neitu Arsenal-i'n 2-1 an hneh. 

Chelsea pawh an insiam tha tan
Tum 4 khelha tum hnih chak, chak loh vawi khat leh draw vawi 1 neitu Chelsea hi tunah Premier League table 6-na an ni mek. Mikhual Leicester City laka Blues goal hnih hi Man City atanga an player lakluh thar Raheem Sterling-a thun ve ve an ni.

Inkhelh tang takah hian Gallagher a tang ulh, minute 22-naah yellow card a hmu a, minute ruk hnuah card hmu nawnin double yelly card vangin hnawhchhuah a ni. Kim lo va, khel Chelsea an talbuai lutuk lo, first half-ah goal lut a awm a, second half tan tirh teah Steling-a hmangin Blues-in hma an hruai, minute lina lekah a goal thihna a thun leh nghal a, si hnih faiin hma a hruaipui. 
Player 11 a khel zawk Leicester City lamin tih ngaihna an hre lawk lo, mahse Harvey Barnes chuan Leicester City tan goal khat rawn thun vein 2-1 a ni. Goal dang luh belh lovin hun a tawp.

Inkhel tir lamah Blues lamin penalty an hlawhchhuak a, mahse VAR hmanga endik a nih hnuah Kai Havertz chu alo offside reng a ni tih hmuhchhuah a ni a, penalty pawh sut leh a ni. Leichester City tana goal khungtu Harvey Barnes pawhin goal a khung a, mahse goalkeeper laka a foul avangin a tih goal chu goal-a pawm sak a ni lo thung.

Kai thar mikhual hlahthlem duh lotu Liverpool
Nizan Premier League inkhelhah Liverpool leh Bournemouth an inkhel a, kaithar Bournemouth Anfield-a leng lut mikhual hlahthlem nachang an hre lo. Si 9 fai zetin hnehna an chang. 

Inkhel inhnehtawk lo takah hian kawng engkimah mual neitu an chungnung zawk a, Liverpool tan Luis Diaz leh Roberto Firmino ten goal hnih ve ve an thun a, Harvey Elliot, Trent Alexander-Arnold, Virgil van Dijk leh Fabio Carvalho ten goal khat theuh an khung bakah Chris Mepham-a own-goal hmangin goal kua an nei a ni. 

Season liam ta runnersUp Reds hian Premier League bul an tan tha lo hle a, game thum khelhah chak la nei lovin point hnih chiah an nei a, nizan an chakna point thum nen tunah point 5 neiin table-ah 8 na niin Man United hnuai chiahah an awm. 

United-in Southampton an hneh
Manchester United chuan Southampton mualah hnehna va changin point thum hlu tak an hlawh chhuak a, point 6 neiin tunah table-ah 7-na an ni mek. 

United manager Erik ten Hag chuan Liverpool an hneh tuma starting XI ngai hmangin bul a tan leh a, inkhel an thunun thei bik lo. St. Mary’s Stadium-ah hian mual neitu Southampton an tang khawng tlat a, goal a lut mai lo. Minute 55-naah Portuguese midfielder Bruno Fernandes hmangin United lamin goal an khung a, goal dang a luh belh lo.