Kum 19 mi chauh la ni mah se, rimawi khawvelah a duai loh zia kan hria - a studio album thar tur 'Happier Than Ever' pawh tlangzarh hma hauhin a lar em em tawh. He album-a a telh tur zinga mi a hla pakhat 'NDA' chu music video siamin Zirtawpni khan a tichhuak a, YouTube lamah en theih a ni. 

Billie Eilish music video thar hi ama direct ngat a ni a, fans tan chuan a hlu leh zual ngei ang. Shooting hi kawtthlerah neiin, professional driver 25 velin zan thim hnuaiah Eilish hi an tlan hual vel a, edit-naah pawh visual effects an hmang lo niin khawthlang media te chuan an tarlang. 

American singer Eilish chuan, "Ka nghakhleh tawh tak zet a ni. Video ka direct tawh zingah chuan ka duh berte zinga mi a ni - a real em em bawk," tiin a music video a dahsan thu hi a lo sawi tawh - kan tawmpui em? 

'Happier Than Ever'
Billie Eilish hian a studio album pahnihna tur Happier Than Ever' chu July 30 hian a tlangzarh dawn a, tun hnaia album chhuak tur zingah chuan ngaihven hlawh berte zinga mi a ni. Kum 2019 khan kau naupangte ni chhungin a studio album hmasa ber 'When We All Fall Asleep, Where Do We Go?' chu a lo tichhuak tawh a ni. 

A album thar tur atang hian single pali - My Future, Therefore I Am, Your Power leh Lost Cause te a tichhuak tawh a, a panga nan 'NDA' a release leh tawh bawk. A tihchhuah hmasak pathum te hi US Billboard Hot 100-ah top 10 an kai vek a, NDA pawh hi mi maktaduai ruk chuang zetin an view leh der tawh a ni.