Thalai khawvel

Billionaire tam berna khawpui Beijing

Admin - Apr 13, 2021

Billionaire 100 nei Beijing hian billionaire 99 nei New York City chu lehpelin khawvela billionaire cheng tam na ber khawpui a ni ta

China khawpui Beijing chu khawvela billionaire tam berna niin, New York City chuan a dawt a, Mumbai chu 8-na a ni. 

American business magazine lar Forbes chuan tunhnai khan 35th Annual World's Billionaire List a tichhhuak a, khawvela billionaire awm zat leh khawpui hrang hranga an insem darh dan chiang takin a tarlang a ni. 

Beijing hian New York City chu lehpelin khawvela billionaire cheng tam na ber khawpui a ni ta a, mi hausatawntaw 100 zet an cheng a ni. Nikum chhung khan Beijing-ah hian billionaire 33 an awm belh a, New York City (99) a lehpel a ni. Top 10-ah hian khawvela khawpui lian leh hming thang tak tak - Hong Kong, Moscow, Shenzhen, Shanghai, London, Mumbai, San Francisco leh Hangzhou te an lang a, India atanga lang awm chhun Mumbai-ah hian billionaire 48 lai an cheng - San Francisco nen billionaire an neih zat a inang a ni.

Hetih lai hian ram mal anga billionaire ngah ber chu United States of America a la ni a, China chuan dawtin, India chu pathumna a ni. US-ah hian billionaire 724 zet an awm a, China-ah 698 awmin heng ram pahnihte hi an sang fal hle. Pathumna hauhtu India hian billionaire 140 a nei a, Germany (136) leh Russia (117) ten an dawt a ni. 

India rama khawpui lian ber Mumbai-ah hian billionaire 48 an awm a, chung zinga mi 10 te chu billionaire ni thar an ni. Reliance Industries chairman Mukesh Ambani chu Asia khawmualpuia hausa ber a ni zui zel bawk a, a hausakna hi $tld 85 zet a ni. 

Beijing-a cheng zingah hian Zhang Yiming chu a hausa ber a, ani hi video-sharing app lar tak TikTok neitu leh a parent firm ByteDance CEO ni lai a ni. A hausakna belhkhawm hi $tld 35.6 a ni a, Mukesh Ambani a la pha lo vai vai hle thung. 

China hian billionaire thar 240 zet a nei a, khawvel ram hrang hrang zingah a sang fal hle. Billionaire ni thar hi khawvel pumah 493 an awm a, chung zinga a zatve deuh thaw chu Chinese an ni tihna a ni. 

Billionaire tamna khawpui 10 
1. Beijing - 100 
2. New York City - 99
3. Hong Kong - 80
4. Moscow - 79 
5. Shenzen - 68 
6. Shanghai - 64 
7. London - 63 
8. Mumbai - 48 
8. San Francisco - 48 
10. Hangzhou - 47