Aizawl April 4, 2024 : Vawiin khan Mizoram Pradesh Congress Committee chuan Lok Sabha inthlan pui neih tur atan Chawngte (C) leh Tlabung-ah Vantlang inkhawm hun hmangin he hunah hian INC Official Candidate Lalbiakzama chuan BJP do tura politics-a lut a nih thu a sawi.

Lalbiakzama chuan, politics a zuan luh chhan sawiin, a pension tirh khan politics a luh a tum lo a. Pawl hrang hrangin an pawla lut turin an sawm tih a sawiin, "Ka lo hnar zel a. Nimahsela, Central lama BJP te rorel dan ka thlirin BJP rorelna do tura ke ka pen chhuak lo a nih chuan nakin zelah kan tu leh faten min la dem dawn nia ka hriat avangin BJP do turin politics ah ka lo zuang lut a ni," a ti.

INC Official Candidate chuan, "Kum 1923 daih tawh khan Essential of Hindutva tih lehkhabu chu Vir Sarvarkar chuan a ziak a. He a lehkhabu Essential of Hindutva lehkhabu hi RSS te chuan an bible ah hmangin Hindu ni lo, sakhaw dangte chungah rawva takin an che chho ta a. India rama hnam tlem zawk leh sakhaw tlem zawk te tihboral tumin hma an la chho ta a ni," a ti.

Lalbiakzama chuan, "Awm chum a, ke per chungin BJP te hi an che ngai lo a. An che buan buan ngai lo. Fing tak leh thiam takin an che chho a. Hei hi Mizo Kristiante hian kan hriatthiam a ngaihthu sawiin kum tam taka ruahmanna an neih tawh chu tunah hian an tihlawhtling chho mek zel a. Hmanni lawkah Ayodhia ah Ram Temple sain Uniform Civil Code pawh BJP an sawrkar leh a nih chuan kan hman ka ring tawh. Manipur-ah nasa takin BJP sawrkar vangin kan unau ten an tuar a, mahse Prime Minister a ngawi hmak. Congress kaihhruai INDIA Bloc (Indian National Developmental, Inclusive Alliance - INDIA) a sawrkar chuan Manipur-a kan unaute buaina leh harsatna hi kan ching fel dawn, thil harsa a ni lo, a awlsam lutuk," a ti.

Lalbiakzama chuan, "India ram hruaitu hmasate chuan hnam hrang hrang leh sakhaw hrang hrangte chu inlungrual taka an awm theih nan India dânpui an duang a. Pu Nehru-a phei chuan India ram chu pangpar huan mawi tak, a chhunga pangpar chi hrang hrang indip buai lova, mawi taka an vul angin a tehkhin a ni. BJP sawrkar chuan India ram hi ramkhat kan nihna angin Sakhaw pakhat, Hindu sakhua chauh hi awm tir an tum. Sakhaw tlem te chunga hleihlenna a hluar chho ta hle a. Khawvel ram te hian mi ram chhung buainaa inrawlh hi an tih ngai loh a ni a, an duh loh berte zing a mi a ni. Nimahsela, BJP rorel danah khawvel ram ropui America, Germany leh UN General Secretary te chuan BJP ten India ram an enkawl danah lungawi lovin thuchhuah an siam ta hial a ni," a ti.