Aizawl April 1, 2024 : MPCC Campaign Committee buatsaihin vawiin khan 'India Ram Democracy Chhanna Rally' Israel Point ah hman a ni a, MPCC Vice President Lalnunmawia Chuaungo, MPCC Campaign Committee Chairman ni bawk chuan thu sawiin, “India ram Democracy hi chhanchhuah a ngai a ni. Keini pawhin tihtur kan nei ve, MP pakhat kan thlang ve dawn a, BJP dodal thei tur Congress Candidate Pu Lalbiakzama kan thlan a ngai a ni,” a ti.

Chuaungo-a chuan, "BJP leh a thawhpui te rorel dan kan hria, a hrechiang tu chu kan Missionary te leh kan kohhran hruaitute an ni. BJP sawrkar hnuaiah hian Election hi ralmuang leh dik taka neih a ni thei tawh lo hial dawn a ni. MP inthlan hi dik lo taka hmachhawnpui min tum mek."

"Modi sawrkar hian Campaign laia an auhla ber thalaite tana hna siam leh ram pawna thalai thawnchhuah te hi a hlawhchham thak a, India ram thalai 65% hi hna neilo an ni mek a, sawi pawh an sawi ri ngam tawh lo. Thalai hna neilo te BJP sawrkar lakah hian an beidawng em em a ni," a ti.

Congress Vice President chuan, "India rama BJP kaihhruai NDA paihthla thei tu chu INDIA Bock te hi an ni a, an dinhmun an hre tawh a, chuvangin dik taka kan inthlan chuan an chak dawnlo tih an hria a, tunah hian Congress chakna tichhiat an tum mek a, an sum leh pai neih pawh Income Tax Department te hmangin an bei mek a ni. Congress Party account 11 zet chu khawih chet theih lohvin an hreng mek a, sum tam tak an chhuh sak bawk. Hetia an tih chhan chu Congress party hian sum kan neih loh chuan kan campaign thei dawn lova, campaign thei lova min siam an tum a ni," a ti .

BJP chu talbuai viau anga sawiin, "Tui tla hian an hmuh theih ang ang an man a, an ban mai thin. BJP hian tla mai tur niin an inhria a, an man theih theih an man mek a ni. Arvind Kejriwal an man nachhan chu Excise Act-a Prevention of Money Laundering Act hnuaiah a ni a, finfiahna pawh engmah an nei lova, politic hmanrua ah an hmang a ni. PMLA dan hi an hmang sual nasa a, Arvind Kejriwal lakah pawh an hmang sual a, mahse, Court ah thiam a chang ngei dawn a ni," a ti.