Aizawl: Nimin khan Brigade Parade ground, Kolkata-ah Trinamool Congress huaihawtin mega rally neih a ni a, he rally-ah hian ZPM Leader Lalduhoma, MLA leh Andrew H.Thangliana, MLA te an tel.   Rally ah hian thu sawiin Lalduhoma chuan, “Tun hnai Lok Sabha-a Citizenship Amendment Bill pass a nih avangin North East pum pui chu ram kang ang maiin a kang duai duai a, he bill avang hian North East mite chuan ram neitu nihna kan hloh chho mek a. India Prime Minister vaukhan leh hrilh duh ka nei a, he bill hi dana siam a nih vaih chuan India ram hi keini tan chuan awm rengna tlakah kan ngai dawn lo a ni. He bill hi hnuhkir emaw North East tana awltir emaw kan duh a ni,” a ti.   Duhoma chuan, “Tunah hian hnam tenau, sakhaw vuantu tlem leh ram zim zawk neitute chu BJP leh a chakna hnar pawl hrang hrangte hnuaiah kan him lo em em a; India ram ropui tak history te chu an duh dan danin an ziak thain an ziak danglam duh a, kan mi mal nunah an inrawlh a, kan ei tur leh ei loh turte min hrilh bawk a, kan sakhaw biakna thilah inrawlhin min zahsak hek lo. India ramah hian kan hma lawkah secular (sakhaw tih bik nei lo) sorkar kan neih ka beisei a. Chutih hunah chuan North East mipuite venhim kan ni tawh ang,” a ti bawk. Mega Rally hi BJP tan ‘Death Knell’ (mitthi dar ri) tia vuahin, United India Rally (India insuihkhawmna Rally) tiin an sawi bawk. BJP chu a zung nena karphawn a nih tur thu te, Pakistan-in kum tam tak chhunga India thendarh an tuma an theih loh chu kum 5 chhungin Modi-a leh Amit Shah ten an thei, lar khel PM aiin PM hnathawk kan duh tihte chu an thusawi lar zual thenkhat a ni.