Aizawl : Nimin khan BJP Mizoram Pradesh Spokesperson K. Laldinthara chuan Atal Bhawan, Upper Republic-ah thuthar thehdarhtu te kawmin RT-PCR khawl chu thil bun harsa tak nia an hriat loh thu a sawi a, Lungleia RT-PCR khawl bunna tur sawrkarin a buaipui dan chu mipui bum tumnaah an ngaih thu a sawi.

BJP Mizoram chuan, RT PCR bun mai a harsat thu state sorkar lamin an sawi reng avangin, tun hnai khan Central Agriculture University (CAU) hnuaia College, Selesih a RT-PCR an hman dan leh an bunna hmunte kan tlawh a, helai mithiam te’n an lo sawi danin RT-PCR hi room zau pangngai ve deuhah chuan harsa lo taka bun mai theih niin a lang,” a ti. 

Covid sample lakte vawn thatna chung-changa harsatna awm nia sawi pawh thil harsa niin a lang lo, sample an lak, -20C vela vawn reng ngai hi hautak hle anga tarlan pawh hi “thubelh chian dawl lutuk lo”­ tiin Mizoram chhunga Vety College-ah hian endik tur vawn thatna khawl, -80 C thlenga tih vawh theih engemaw zat an kawl a, corridor-ah te bun mai mai niin a sawi. 

Tun dinhmunah hian RT-PCR dinna tura hmun zau tak, building lianpui emaw a tul ber lovin a lang a. State dang ten Mobile RT- PCR an hman tan tawh lai hian Mizoram sorkar hian a tih tur a ti tawk lovah BJP- Mizoram Pradesh chuan an ngaih thu a sawi bawk.

“High Court lamin Lunglei RT- PCR dinna tur chungchang a thupek a tichhuah avangin chawpchilh takin RT-PCR bunna tur, insakna tur a han lai rum rum a. Ruahmanna state sorkar in a  siam ang hi chuan, a rang thei ang ber a chhun zan zawm a bei pawh nisela, hun a la duh rei dawn hle a. Hei hi mipui bum tumna mai niin alang a, a nihna takah chuan DoNER/ NEC ah a sakna tur an dil mek chauh a ni,” a ti bawk.