Aizawl April 30, 2024 : BJP Mizoram chuan ZPM sawrkar chu zawhna zawtin, MLP Act 2019 hi an hmang nge hee Act hi hnawl a, zu zawrh tumin zu an thlah zalen mek? an ti. An zawrh duh chuan huaisen deuhin zuar law law se, MLP Act 2019 hi an hmang anih chuan dan leh thupek huaisen takin kengkawh rawh se, an ti.

BJP Mizoram chuan, "Aizawl khawpui ah leh hmun dang dangah Zu a tam hle a, Mizoram Sawrkar hian MLP Act 2019 hi an hmang nge? He act hi hnawl a zu zawrh tumin zu an thlah zalen mek ti hi kan zawt a ni. Zu hi an zuarh duh a nih chuan huaisen takin zuar se, MLP Act 2019 hi an hmang anih chuan dan leh thupek huaisen takin kengkawh bawk rawh se, tih hi kan ngenna a ni," an ti.

BJP chuan, "Kan hriat theuh angin sawrkar hmasa atangin zu hi khap ni mah se, a ruka a zalen zia kan hria a. Engtik lai pawhin zu in mi chuan duh hunah lei tur an hmu a ni. Tun dinhmun ah hian Aizawl khawpui restaurant-ah zu an zuar tel a, hei hi sawrkar hian a hre lo der em ni? tih pawh hi zawhna lian tak a ni," an ti bawk.

"Kalphung thar zuartute ah Kalphung awmze neilo kan hmu fo hi a fuhlo hle a, kalphung ngai reng, a mihring leh tawngkam chauh thar hi Mizoram mipui ten kan beisei dan a ni lo. Thla 5 zet ZPM sawrkar kan hmu ta a, sawrkar thar hian kalphung awmze nei min hmuh tir tak tak a hun tawh, thu ringawt a kalphung tih thar hian mipui retheihna bak a thlen lo tih hria a, mahni nihna anga huaisen taka lang chhuak ngam mai turin ZPM Sawrkar Chief Minister Pu Lalduhoma kaihhruai hi kan ngen a ni," an ti.