Aizawl March 5, 2023 : Congress President Lal Thanzara chuan ram leh hnam hmangaihtua Mizo pui te Central-a Sawrkarna chelh mektu BJP sawrkarin hnam tenau zawk leh sakhaw tenau zawkte dimna nei miah lova dan hmanga a sawisa thin chu tihbo tul a tih thu a sawi a, chumi tur chuan Kohhran, Party leh NGO te a sawm.

Lal Thanzara chuan, "CAA hmang te, UCC hmangte, Anti Conversion Act hmangtea Kristiante min bei chamchi mai hi tihtawp a ngai a, kan titawp lo anih chuan kan la ral mai ang tih a hlauhawm a ni. Kan ram Danpui Constitution-a mi Secularism paihbo an tum hi Kristiante tihchhiat vek an tumna hmanrua a ni a. Chuvangin, kan tanrual a ngai a ni," a ti.

BJP sawrkar paithla turin tan lak a ngaih thu sawiin, "Central-a BJP sawrkar paihthla tur hian Congress Party chuan Mizoram Secular Force a dina, Political Party hrang hrangte, NGO te, Kohhran hrang hrangte lo tel turin kan sawm vek a; kan ram, kan hnam, kan sakhua a himna tura pheikhai rual taka tanhopui atan kan sawm che u a ni. Kan sakhua, kan Kristinna a him zel theih nan thi leh thau pawlha kan tan a ngai ta tak meuh meuh a ni," a ti bawk.

Kum 2018 a Myanmar ram nena awlsam taka in tlawhpawhna Free Movement Regime, Ministry of Home, Government of India in min paihsak a tum ta mai hi chu duhlo a, theihtawpa do zel an tum thu a sawi.

Ni 6.2.2024 a Union Home Minister-in Myanmar nena inrina ramri hung an tum thu a sawi ta mai hi pawi an ti a. Hnam khat, thlahkhat te min thendarha, tuna in pawh leh thei ta hi an lawm a, inthendarh zawnga India sawrkarin hung a tum leh ta mai chu an duh lo a, an do zel dawn an ti bawk.