Aizawl February 6, 2023: Vawiin khan BJP Mizoram Karthar inhlanna chu BJP State Office Upper Republic, Atal Bhawan Mipui Run-ah an nei a, State President Vanlalhmuaka chuan MNF Legislature Party chu buaipui ngai rih lo Uniform Civil Code (UCC) buaipuiah a puh a, Mizoram tana pawha thal theih Union Budget chhawr thei turin Chief Minister leh Finance ni bawk chu hma la tura a phut thu a sawi. 

Vanlalhmuaka chuan, "MNF in January 23, 2023-a MNF President leh  Chief Ministry Pu Zoramthanga kaihhruaina hnuaia, MNF Legislature Party thukhawm in Uniform Civil Code (UCC) thil awm lo leh do ngai rih lo do a, Assembly Budget Session lo awm tura UCC dodalna put luh an tum hi mipui ngaihdan hruaikawi tumna leh fuihpawrh tumna mai a ni a, thudik leh thubelh chian dawl lo vawrh darh a, Mizoram mipui hnena an intiamna an tih theih si loh laka inphenna tumna a ni. Vawiina MNF ten an thil do tum hi thil awm rih lo leh do ngai miah lo a ni," a ti.

BJP State President chuan, "UCC buaipui lovin Mizoram mipuite hma a an intiamna zawk, chhungtin tan Cheng nuai 3 kan sem dawn a tih te, Kum hnih chhunga Aizawl khawpui Traffic Jam awm lohna khawpuia siam te, Aizawl khawpui kawng chhawng siam a intiam te, Vai buhfai ring lova Buh leh bala intodelh a sawi te, Assam Rifle Zokhawsanga sawn chhuah a tum te, Assam - Mizoram state ramri buai chungchangah te hian kan Chief Minister Pu Zoramthanga hi ngaihtuahna seng zawk turin ka ngen a ni," a ti.

Hmuaka chuan Union Budget 2023-2024 chungchang sawiin, "India ram mi chi tin thleng phak leh chhawr theih tur BJP sawrkar Modi-a kaihhruai in an buatsaih leh ta hi a lawmawm. Mizoram State sawrkar pawhin he Union Budget kan thal theih tura an dah hi Mizoram mipuiten kan chhawr theih ngei turin kan Chief Minister leh Finance changtu ni bawk hi hma la turin BJP Mizoram Pradesh chuan kan phut tlat a ni," a ti bawk.

Vanlalhmuaka chuan UCC chungchanga MNF Party President Zoramthanga kaihhruai Committee-in UCC chu Central Sawrkarin Parliament ah pass mai tura an ngaih avanga an Party chuan a tawp thlenga an do tur thu an puan chu thil tak tak lo, dawt a ni tih Parliament-a kan MP zahawm tak K. Vanlalvena zawhna Union Home Minister Kiran Rijiju-a'n a chhanna khan a tichiang hle a, a ti. MNF Party Zoramthanga kaihhruai mawng hlimna niin a sawi bawk.