Aizawl March 12, 2024 : BJP Mizoram Thalai Headquarters chuan vawiin March 12, 2024 hian social media lama BJP tihhmingchhiatna lam hawi thehdarhtu te lakah FIR an thehlut.

BJP Mizoram Thalai chuan Tun hnaia social media-a thehdarh; Uttar Pradesh-a BJP te'n kristian pa an sawisak rawn ni awm taka an thehdarh chu thu diklo a ni tiin, Punjab-a misual rukru nia puh an sawisakna zawk a ni a, he video tawi thehdarh hi Kohhran thenkhat lo tawngtaipui hialte an awm ni awmin a lang a, Kohhran thlenga Dawt Politics-a inbum tel hi a pawi an ti.

BJP thalai chuan Inthlan dawn hnaih apianga BJP beihna tura thudik lo vawrh darh ching Party thenkhat atanga chhuak ni ngeia hriat a awm thin tiin pawi an ti a, Politics chu sakhuana nena kaihkawp luih tum a, India ram chhung state thenkhata Hnamdang insawisakna video/thlalak te chu remchanga hmang a, Mizo Kristiante rilrem zawng a nih vanga Kristiante tawrhna anga BJP sawrkar tih hmingchhiatna tura dawt vawrh thin chu Mizo mipuite zahlohna leh hmuhsitna ah an ngai a, Sakhuana pawh inbumna ah an chantir ah an ngai, an ti.

Heng thawndarh tute hi Dan anga a tul anga hremna pe ngei turin thuneitute an ngen a, tun hnuah Mizo mipuite bum an nih tawh lo nan, na taka an chunga hremna pe ngei turin an ngen a ni.