Rajasthan-a Jaipur police-te chuan tlangval kum 28 mi chu lehkha zir nana a benga a vuah a Bluetooth headphone a puah avangin a thi niin Inrinni khan an sawi.

He chhiatna hi Jaipur district-a Chomu khua, Udaipuria-a Zirtawpnia thleng kha a ni a. Rakesh Kumar Nagar-a hi an chenna ina competitive examination hmachhawn tura inbuatsaiha lehkha a zir laiin chhiatna hi a tawng ta niin police chuan an sawi.

“A Bluetooth headphone device hi electric-a charge chungin a hmang a ni,” tiin police chuan news agency Press Trust of India hnenah an sawi.

A hman lai reng hian a puak darh vek a, nikhawhrelovin a awm a. Mi mal damdawi inah phurh nghal ni mah se a thi ta tho va. A beng lehlam lehlam hi a hliam nasa hle niin an sawi.

Siddhivinayak Hospital -a thawk, Dr LN Rundla chuan a headphone puak avanga nikhawhrelova a awm thu leh damdawi in hian theihtawp chhuah mah se an chhan theih loh thu a sawi.

Doctor hian lungphuchawla thi a nih thu news agency PTI hi a hrilh bawk.

Police chuan Rakesh Nagar-a hian February thla khan nupui a nei a, an unau zinga upa ber a nih thu an sawi.