ZALEN, June 13, 2026: Force Motors Business Manager Rajarshi Mukherji-a chuan Zirtawpni chhun khan Millennium Centre, Aizawlah an car thar, Trak Gama a tlangzarh a, Mizorama car hriat hlawh tak pahnih Mahindra Bolero leh Tata Sumo el tura siam a ni tih a sawi.

Mizorama Force Motors dealer, LBS Motors-in Bawngkawnah showroom leh service station nei mah se mipui tam zawkin an hmel hriat theih nan Aizawl hmun lailiah Gama an pho chhuak a, Rajarshi leh Area Sales Manager Anshul Khana chuan Mizorama hralh chhuah turin a khuhna an hawng.

Ex-showroom prize-in air conditioner (AC) awm Rs 12,74,000 a nih laiin AC awm lo Rs 11,73,000 a ni a, Mizorama lei hmasa ber, Lai Christian Fellowship hnenah chabi hlanin an hralh chhuak nghal.

Rajarshi chuan India-ah Force Motors siam bus leh car chi hrang hrang nuai 10 chuang a tlan mek a, German automobile company hlun pahnih, Mercedes leh BMW-in India-a car an hralh chhuahah Force engine an hmang vek tih a sawi bakah an car thar, Gama chu mi 10 thut theih tura duan ni mah se a aia tam chuan theihna tura ruahman lawk a nih avangin chhungkaw tana tangkai tur leh mipui phurtu sumdawnna lirthei atan hman theih a nih thu a sawi.

Mizoramah maxi cab atana Sumo deuh vek hman a ni a, Sumo Gold a chhuah hnuah April, 2019 khan Tata Motors chuan a tihtawp a. Force Motors leh LBS Motors chuan Sumo thlak nan Gama hman theih an beisei hle a, car rental atana zahpuiawm lo turin changkang leh chuan nuam tura thuam a ni tih Rajarshi chuan a sawi.

Sumo bakah Mizorama car hralh kal tak, Bolero sawi tel bawkin, a elpui company dang car aiin Gama a sei zawk avangin a chhung a thawl a, a chak zawk bawk a, kawng tha leh chhiaa tlan thei tur a nih rualin kuala inthen leh sawi nasa lo turin a venna dah tel a ni tih a sawi bawk.

Infocars hotupa, Vanlalmuana chuan a hmain Force Motors-in hlawhtling takin Trax an tichhuak tawh a, SUV ni tura tuai tharin Trax Gama an rawn tichhuak leh tih a sawi a. “A hmaa mi aia chuan nuam leh khalh nuam turin changkang zawka thuam a ni a, a engine a tha a, diesel a heh lo a, khân sang chungin a nghet a, a hnung leh hmaa chuangte tan AC a awm kawp bawk a ni,” a ti.

Gama leitute tan warranty kum nga pek a nih bakah kawng laka chhiat thulha inpuihna, roadside assistant kum thum chhung a thlawnin a pe bawk a. Spare parts mamawh tan Bawngkawn West, Aizawl (Ph. No. 6909251882) biakpawh theih reng a ni bawk.

TRAK GAME

- Engine: 2.6L (2596 cc), 3-cylinder/4-cylinder diesel engine, 60–67 HP @ 3200 rpm leh 158–175 Nm of torque.

- Gear: 5-speed manual transmission; sei zawng - a ke hma leh hnung kar sei dan azirin 4232–4486 mm; a len zawng - 1660–1790 mm; a san zawng - 1980–2055 mm; khan san zawng - 191–210 mm

- Brake: a hma lam disc, a hnung drum; brake pui turin Anti-lock Braking System (ABS) leh Electronic Brake-force Distribution (EBD) a chhawm.