Aizawl March 5, 2024 : Mizo Zirlai Pawl (MZP) General Headquarters, Aizawl buatsaihin vawiin March 5, 2024 hian School Education Conference Hall, Treasury Square-ah kum 1966 March 5-a Bomb hmanga Mizoram beih a nih champhaphak 'Zoram Ni' hman a ni a, Home Minister K. Sapdanga chuan khuallian niin a hmanpui.

Khuallian Home Minister K. Sapdanga chuan, "Mizo hnamin kan tawrhna hi theihnghilh chi a ni lova, MZP in a tha zawnga kumtin a hmang hi a lawmawm ka ti hle a. Jet Fighter hmanga Mizoram beih champhaphâk hi hnam hmangaih tharna a nih ngei ka beisei a ni," a ti a. "Khawvel hmun dangah pawh an ram leh hnamin harsatna an tawh ni hi a tha zawngin an hmang thin a. Japan rama America-in Hiroshima leh Nagasaki a bomb ni chu 'World Peace Day' tia hman thin a ni," a ti bawk.

He hunah hian MZP President H. Lalthianghlima chuan, "Ram leh hnamin hun harsa a tawh hi theihnghilh mai chi a ni lova, phuba lak tumna leh thinrim tharthawhna tur a ni lova, hnam anga tanrualna leh inpumkhatna ni atan i hmang ang u," tiin, "Zofate kan lo inlungrual a, kan inpumkhat hi kan hnam dinchhuahna tura thil pawimawh a ni," a ti.

MZP President chuan, "MZP chu zirlai pawl a nih angin, Zirna tihmasawn na tura hnathawh hrang hrangte ngun takin kan endik dawn a. A theih ang angin sawrkar kan thawhpui dawn a, thil dik loah chuan kan sawisel hreh dawn lo a ni," a ti bawk.

Kumin Zoram Ni thupui 'Zofate insuihkhâwmna hmathlir' tih hman a ni a, Dr. Vanlalremruata Tonson Asst. Professor PUC-in Paper a buatsaih chu zir ho a ni a. Kalkhawmten an sawiho a ni.