Bomb tipuaktu man la ni lo

zalenxhg - Feb 01, 2014

Bomb tipuaktu man la ni lo

Tute tih pawh nise sorkar beihna a ni : HM Aizawl; January ni 30, 2014 zana Assembly House bul, Treasury Square bazar-a bomb tipuaktute chu ngawrh taka chhui mek an ni a, nimin thleng khan he thila inhnamhnawih emaw, rinhlelh man emaw an la awm lo a. Home Minister R Lalzirliana chuan, he bomb tihpuah hi, a titute chu tupawh nise sorkar beihnaah a ngai tih a sawi. He bomb puak chung-changah hian Home Minister R Lalzirliana chuan, “He thil thleng hi tute tih pawh nise, sorkar beihnaah ka ngai a," tiin, khawtual mite tih a nih a rin phal loh thu leh, Mizoram remna leh muanna tihchhiat duh zawnga che an ni ang em tih ngaihdan a neih thu a sawi bawk a. Sorkarin hetianga mipui tiralkhela pawi khawihtute chu sorkarin a chhui ngei dawn tih a sawi bawk. Ningani kalta zan dar 11 vela Treasury Square bazara bomb tihpuah chungchangah hian Aizawl Police Station-ah thubuai, Aizawl PS Case No.28, Dt.31.1.2014 u/s 436 r/w 3 of Esplosive Substances Act, 1908 ziahluh a ni a. Forensic Expert ten bomb puah zan, January ni 30 zan leh a tuk, January ni 31 chhunah khan bomb puak sulhnu leh thil pawimawh dangte enfiahin Laboratory-a exam turin an la nghal a ni. Aizawl SP, LR Dingliana chuan bomb puak chungchanga inhnamhnawih leh rinhlelh man emaw an la nei lo tih nimina Zalen-in a biaknaah a sawi bawk. Mizorama tlawmngai pawl lian ber, Central YMA President Lalbiakzuala chuan, hetianga mipui tiralti zawnga tharum thawha chetna a thleng chu pawi a tih thu sawiin, "Tun hnu-ah chuan hetianga tharum thawha chetna hi thleng nawn leh tawh lo se ka duh khawp mai," a ti. Ningani kalta zana Treasury Bazar-a bomb puak hian dawr 10 vel zet chu hman zui tlak lohin a suasam a, Assembly House building nena inngheng, Assembly driver-te room pawh a tichhe nasa hle a, Information & Public Relations office building tukverh darthlalang engemawzat a kehchhe bawk a. Mihring thi leh hliam erawh an awm lo a ni.
Share now