Irish rock band member Bono leh The Edge te chuan Russia-in nasa taka a bomb Ukraine khawpui Kyiv an tlawh a, metro station-ah an perform. Ukraine president Volodymyr Zelensky chuan Irish rocker te hi an ram khawpui tlawh tur hian a sawm a, indona avanga harsatna tawkte tlankhawmna hmunah huan an hmang a ni. 

Kum 61 mi Bono chuan Ukrainian te an thlawp tlat tih sawiin, "Ukraine mipuite hian an mahni zalenna tur chauhin an bei lo a, zalenna duhtu zawng zawngte tan an bei a ni," tiin a sawi. 'Vertigo' hitmaker chuan Russia thalaite chu an ram president Vladimir Putin chet dan titawp tura hma an lak a beisei thu a sawi chhuak bawk. 

Russia sipaite chuan Kyiv hi nasa takin an bei a, mipuiin an sa himna zawngin khawpui an chhuahsan nasa hle. Heng mite hi hmun hrang hrangah an kal darh a, a then chu khawlai leh hmun remchang laiah an khawsa. Heng mite fuih phur tur leh thlamuan tur hian Volodymyr Zelensky sawmna ngaipawimawhin Bono leh The Edge te hian Kyiv khawpui hi an pan ta a ni.