ZALEN, Dec. 04, 2024: Mizo Academy of Letter (MAL) Book of the Year 2023 ziaktu, Ahmangaihi Khiangte lehkhabu thar, ‘Suzanne’ chu chu Nilaini chawhnu atang khan vantlang lei theih tura tlangzarh a ni ta.

Ahmangaihi lehkhabu thar hi kum 1997-a a ziah, Pasaltha Khuangchera hmanga MAL Book of Year chawimawina lo dawng tawh, Dr. Laltluangliana Khiangte, Sr. Professor & Dean, School of Humanities & Languages, Mizoram University-in Synod Conference Hall-ah a tlangzarh a ni.

Ahmangaihi lehkhabu pahnihna hi kum khat chhunga Mizorama Mizo tawng lehkhabu chhuak zinga tha ber chawimawina a dawn phahna, ‘Pangparhnima’ aia a ziah hmasak leh tihchhuah pawh a tum hmasak zawk a ni.

‘Suzanne’ hi thawnthu (novel) niin inhmangaihna thawnthu (love story) a ni a; bung 30 awmin phek 511-a chhah, Rs. 450 man a ni.

A lehkhabua duhsakna thuhma ziaktu, Mizo novelist hriat hlawh ber pawl, Book of the Year chawimawina lo dawng tawh tho, Lalrammawia Ngente chuan, ‘chhiartu tana hahdam taka chhiar chunga an khawvela min chentir tlat thawnthu’ tia ziakin, “Hmangaihna chingchivet, hmangaihna hmang veka phelh, hmangaihna leh indawh tawnna avanga par chhuang, natna leh dotu hri leng chi hrang hrangten a dî hneh loh chu,” a ti.

Ahmangaihi’n ‘Pangparhnima’ hmanga MAL Book of the Year 2023 chawimawina a dawn khan a dawng tawh mi 35 zinga hmeichhe dawng thei pangana chiah a ni.