Aizawl: Economics & Statistics Department in baseline survey hmanga mi rethei zat chhiarpui Below Poverty Line an neih ah Mizoram mihring zinga 18.31% chu BPL an ni a, hei hi a hma lama lo hman thin aiin nasa takin a tlahniam. Mizoram sawrkar hnuaiah FCS&CA, Health, RD, UD&PA department te chuan BPL list hrang hrang an nei a, sawrkar department in list hrang hrang an nei hi a tha lova hriain Planning & Programme Implementation Department chuan state, district leh khaw hrang hranga BPL thlangtu committee a din a. Committee-in uluk taka an enfiah hnuah chhungkaw 5139 (18.31%) chu BPL turin an thlang ta a ni. Health Department chuan Economics & Statistics Department-in BPL list an siam thar hi nakkum atangin hman tan a ni dawn tih Zalen an hrilh a, tuna Health Care atan BPL list (RSBY) an neih mek pawh nasa takin a tlem dawn niin an sawi bawk. Planning Secretary Dr. C.Vanlalramsanga chuan Mizoramah BPL survey hrim hrim tih a la ni lo nia sawiin, “Eng emaw thiltih dawnah sawrkar laipuiin BPL thlan tur zat te a rawn siam chawp thin a. Mahse a zat dik tak (actual figure) kan neih loh avangin sawrkar chuan a zat dik tak neih tha a ti a. Chuvangin, survey nei ngeiin kan thlang ta a ni,” a ti. Department hrang hrang ten tuna BPL list siamthar chu an ring dawn em tih Zalen zawhna chhangin, “Sawrkar thutlukna tur a ni a, keini chuan an ring turah kan ngai,” tiin kan palai a hrilh bawk. Economics & Statistics Department thawktute hnen atanga Zalen thudawn danin khua/veng hrang hrangah hian Local/Village Council kaihhruaina in baseline survey hi neih a ni a. Khawpui ah chuan thla khata Rs. 2100 lalut tling lo leh thingtlangah chuan thla khata Rs. 1800 lalut tlinglo te chauh thlan an ni a. Heng bakah hian motor, computer, fridge, washing machine, dawr nghet leh leilet hmun nghet neite chu thlan an ni lo bawk. Survey hi nikum 2016 chhung khan neih a niin tunhnai khan an thil hmuhchhuah hi tarchhuah a ni a, a duh tan sawiselna hun hawn mek a ni. Economics & Statistics Department thawktute chuan tun tuma survey an neih chu a dik thawkhat hle turah an ngai tih sawiin tun hma lam chuan political party ten inthunna remchangah an hman thin avangin a dik tawk lo thin niin an sawi bawk. Baseline survey atanga a lan danin a mihring cheng zat atanga chhutin Mamit district-ah BPL an tam ber a, Aizawl-ah an tlem ber thung.