Lemchan thiam hming thang Brad Pitt leh Angelina Jolie te inkar thu chingfel tur hian hun a duh rei khawp mai, tunah pawh an chungchang ngaihtuahtu judge pakhat chu Angelina Jolie ngenna angin disqualify a ni. 

Brad Pitt leh Angelina Jolie te hi kum 2016 khan an inthen a, an fate enkawl chungchang thlengin rei tak an buai a, an fate hi Jolie hian a enkawl mek a ni. 

Kumin May thla khan Pitt-a private judge John Ouderkirk chuan an fate hi an pahniha enkawl a phal sak a, mahse hei hi Jolie chuan duh loin a khinglet a ni. Zirtawpni khan California Court chuan Jolie dilna hi pawm sakin, Pitt-a private judge John Ouderkirk chu an inkar ngaihtuahtu a nihna atangin 'disqualify' a nih thu a tarlang.

US-ah chuan private judge rawih hi an ching hle a, a bikin milar inthen ten an hmang nasa hle. Brad Pitt pawh hian private judge a ruai a, mahse Court chuan a hnawlsak leh nghal a ni. 

Jolie hian an fate paruk - Maddox (19), Pax (17), Zahara (16), Shiloh (15) leh kum 13 mi phir Vivienne leh Knox te chu a enkawl a, Brad Pitt hian sum leh paiin a tanpui thin niin khawthlang media te chuan an tarlang. 

Jolie leh Pitt te hi 2004-a tihchhuah 'Mr and Mrs Smith' ah khan an changdun a, heta tang hian inhmutai zuiin, kum 10 chuang  an chendun hnuah September 2016 khan an inthen a ni.