Prince Harry pawh British Book Award-ah sem tur a hming a chuang ve vang mai. Ani bakah hian zaithiam Britney Spears hming pawh a lang ve bawk. 

British Book Award 'Book of the Year' list-ah hian Prince Harry lehkhabu ziah 'Spare' chu a langsar zingah a tel a, category pahnih-ah a lang nghe nghe. He lehkhabu hi January 10, 2023 khan tlangzarh a ni a, lehkhabu hralh kal leh lar ber zinga mi a ni.  

Nominee-ah hian Star Trek Sir Patrick Stewart leh comic character Alan Partridge te pawh an lang a, hming langsar tak tak an awm nual. Britney Spears autobiography 'The Woman in Me' hi October 2023 khan tlangzarh a ni a, a larin hralh pawh a kal hle - Book of the Year dawng thei tur hial zingah a lang a ni. 

Spare pawh hi autobiography tho a ni a, Duke of Sussex Prince Harry kut chhuak niin, phek 416-a chhah hi Penguin Random House ten an tihchhuah sak a ni. Tawng chi hrang 16 zetin chhiar theihin a awm a, audiobook a awm cheu bawk. 

British Book Award 2024 hi May 13, 2024-ah sem a ni ang.