Britney Spears 'Conservatorship'

Admin - Jul 05, 2021

Duh duh dana awm chu duh loh dana awmna

Tun lai chu American singer Britney Spears 'conservatorship' chungchangin media a luah hneh hle mai a, a thlavang hau saktu pawh an hrawl sawt hle. Chutih rual chuan 'conservatorship' chungchang hi vawi leh khata chin fel mai theih a ni lo a, Court thutlukna ngaihchan zel a ngai - duh duh dana awm chu duh loh dana awmna an tih kha maw!  

Kum 39 mi lai ni ve tawh Britney Spears hi a lar vanglai khan a talbuai ve hle a, amah leh amah pawh a inthunun hleih theih tak loh avangin a pa James Parnell Spears chu 'US Conservatorship Law' hmanghin a chunga thu neitu atan court chuan a ruat a ni. 
A pa Jamie Spears hi 2008 khan a co-conservator atan ruat phawt a ni a, a hnu 2009 ah phei kha chuan Britney Spears 'conservatorship' zawng zawng a kutah dah a ni - Britney Spears chunga thu neitu ber chu Jamie Spears hi a ni ta tihna a nih chu. 

Thil thlen chhoh dan

* January, 2008 : Britney chu Hospital-ah kalpui a ni a, a taksa bakah a rilru lam thlenga buaina a neih avangin mahni inenkawl thei tawh loah ngaih a ni.

* February, 2008 : 'US Conservatorship Law' hmangin a chunga thuneitu Conservator atan a pa Jamie Spears chu ruat a ni a, a sum leh pai bakah a mimal nun enkawltu atan ruat a ni. Los Angeles Superior Court Commissioner Reva Goetz chuan Jamie Spears hi kum 2008 chhung atan a thu neihna pawhsei sak a nih thu a puang zui bawk. 

* April, 2012 : A agent leh kawppui hlui ni bawk Jason Trawick chu co-conservator atan ruat ve leh a ni a, Britney mimal nuna thutlukna siam kawngah thu neihna pek ni mah se, a rosum enkawl chungchangah erawh thu neihna pek a ni lo. Britney leh Jason Trawick te hi December 2011-ah an inhual a, hemi hnu hian co-conservator atan atan hian ruat a ni. 

* September, 2016 : A vawi khat nan Britney chuan a Conservatorship chungchang interview-ah a sawi chhuak. 

* March, 2019 : Andrew Wallet chu Britney Professional Conservator a nihna atangin a bang. 

* Apri, 2019 : Britney chu Mental Health Treatment Center-ah ni 30 chhung check-up tih thin a ni. 

* July, 2019 : Conservatorship chungchangah Britney chu Los Angeles Superior Court-ah a zualko. 

* September, 2019 : Jamie Spears chu a hriselna chhuanlamin a fanu Conservator a nihna atangin a bang lai lawk a, a aihawm lailawk turin Jodi Montgomery ruat a ni. 

* August, 2020 : Judge Penny chuan Britney Conservatorship chu February, 2021 thleng atan pawhsei a nih thu a puang.

* September, 2020 :  #FreeBritney Movement kalpui tan a ni. 

* November, 2020 : Britney chuan a chunga thuneitu Conservator Jamie Spears chu conservator a nihna hlih sak turin Court a ngen a, a pain a chungah thuneihna a neih chhung chuan a music career chhunzawm a tum tawh loh thu leh vantlang hmaah inlan a tum tawh loh thu a sawi.  

* February, 2021: Britney lawyer chuan Britney-i'n Conservator neih a duh tawh loh thu a thlen nawn a, hemi chungchang hi Los Angeles Superior Court chuan a ngaihtuah zui. 

* March, 2021: Jamie Spears chuan a fanu chungah thuneihna neih a tum tawh loh thu a puang a, Britney chu zalen se a duh thu leh conservatorship pawh hlihsak se a duh tih a sawi. 

* March, 2021: Britney chuan a conservator lailawk Jodi Montgomery chu a conservator nghet atan ruat turin Court a ngen. 

* April, 2021: Britney attorney Ingham chuan Britney chu Court-ah thu a sawi phal sak turin a ngen. 

* June, 2021: Court-ah thu a sawi phalsak a ni a, telephone kaltlangin  minute 20 chhung a duh zawng sawi tir a ni -Conservatorship hlih sak tura a ngenna erawh hnawlsak a ni. A thusawi hi darkar khat lek hnuah internet lamah a darh nghal avangin, a puala audio attendance program an ruahman sak chu tihtawp nghal a nih thu puan a ni zui bawk. 

* June 29, 2021 : Jamie Spears chuan Britney-i'n Court hmaa a puhnate chu thudik lo a nih thu sawiin, chhui chiang turin a phut. Britney chuan a pa hian hna a thawh luih tir thin bakah, medical treatment leh therapy a lak luih tir a, damdawi hmanga enkawlna a dawng tha loin a mimal nun a zahsak lo hle niin Court hmaah hian a a sawi a ni. 

Britney Spears 'Conservatorship' chungchang hi a la tawp mai dawn lo niin a lang a, eng nge thleng zel dawn tih chu media te ngaihven ber pakhat a ni mek. 

Share now