American singer Britney Spears chuan ‘Conservatorship’ chungchangah hnehna a chang chho dawn niin a ngaih theih a, court chuan ama duhtlannaa dan hremi lawyer rawih a phalsak phawt. 

Court-in phalna a pek chungchangah hian a nu Lynne Spears leh a laizawn Jamie Lynn Spears te chuan lawmpuina thu an sawi chhuak nghal a, Lynne Spears chuan, “Eng chuan thimah par a rawn chhuah ta, thim chuan a hneh zo ta lo,” a ni, tiin social media lamah a tarlang. 

‘Baby One More Time’ hitmaker Britney Spears hi ‘Conservatorship’ chungchangah hun rei tak chhung a buai tawh a, court chuan a chungthu hi a ngaihtuah mek zel a ni. 
Lawyer rawih a dilna chu court hian a phalsak tawh a, hei hi a hma lam hun atana thil pawimawh tak a ni. Kum 10 chuang teh meuh a pa Jamie Spears thuneihna hnuiah a kun tawh hnuin tunah chuan zalenna beiseiin a dinhmun a siam tha chho mek a, hnehna chang ngei turin mi tam takin duhsakna an hlan. 

Britney hian a pa hi a chunga thuneihna hmangsualah a puh a, court-ah zualkoin ‘Conservatorship’ chungchang hi an ngaihtuah mek a ni. 

Kum 39 mi Britney Spears hi a vawi hnih nan phone hmangin Los Angeles judge hmaah minute 10 chhung thusawina hun pek leh a ni a, a pa demna thu a sawi chhuak nasa hle. Britney chuan, “Ka dik vek lo tih chu ka pawm, chutih rual chuan min rahbeh hi an tum ber chu a ni. Ka pa hian ka chungah thuneihna dik lo takin a lekkawh a, ka dikna chanvo rah behsak ka ni,” tiin a sawi a ni. 

Britney Spears hi amah pawh a inthunun hleih theih tak loh avangin a pa James Parnell Spears chu ‘US Conservatorship Law’ hmanghin a chunga thu neitu atan court chuan a ruat a ni. He ‘Conservatorship’ hmang hian a pa chuan a fanu chungah hian thuneihna thuk tak a nei a, hei vang hian Britney Spears chuan a mi mal zalenna chu rahbehsak nia ngaiin court-ah a zualko ta a ni.