Aizawl: Tripura Bru Relief Camp atanga Mizoram rawn lut chu beisei anga pha lo mah se, an rawn la luh belh ve zel a, nimin khan Lunglei district-a awm tur chhungkaw 20-te chuan Lunglei district an lut ve leh tawh a, 2nd Bn. MAP Hqra, Luangmual-ah dah rih phawt an ni. In sak bul tanna tur Rs 25,000 leh mamawh leina tur Rs 5,000 pek nghal an ni.

Bru repatriation thawh thumnaa Lunglei District Bru rawn let hi chhungkaw 20 niin an zavaiin mi 81 (Adult – 51, Minor - 30) an ni. 2nd Bn MAP Hqrs, Luangmual ah hian Lunglei DC Pi K. Lalrinzuali, 2nd Bn. CO Pu Saidingliana leh official eng emaw zatin lo hmuakin inkhawmna hun tawi neih a ni.

Bru lo kirte hmuahna inkhawmah hian Lunglei DC chuan thu sawiin, “Bru repatriation chu sawrkarin a ngaih pawimawh vangin chawlh lawkna leh an in sakna tur hmun House Plan Site te pawh mumal taka ruahman a ni. An chawlh lawkna (temporary shelter) ah hun rei tak an awm theih dawn lo a, a rang thei ang berin chenna in ngaih-tuah a ngai,” tiin Bru chhungkuate hi a chah nghal. An khaw pana an kal zelnaah Police ten an ven chhunzawm zel tur thu leh hriselna lama harsatna neite tan H&FW Department atanga duty an awm tur thu a sawi bawk.

9th Batch Bru Repatriation ah hian Lunglei District ah Bru chhungkaw 364 an zavaiin mi 2051 hruaikir tur niin heng chhungkaw 364 te hi Lunglei District huam chhunga khaw pali- Putlungasih – chhungkaw 121, Chawilung S – chhungkaw 43, Dinthar – chhungkaw 187, leh Buknuam – chhungkaw 13 ah hruai kir tur an ni. Tun dinhmunah Lunglei District ah Bru chhungkaw 68 an zavaiin mi 262 hruai kir tawh an ni.

Nimin khan 2nd Bn MAP Hqrs, Luangmual ah zing tuk thuan ei pui an nih hnuah 8:00 am vel atangin anmahni khua theuh panin chhuahpui leh an ni. Chhungkaw 20-te hi khaw pali - Dinthar, Putlungasih, Buknuam leh Chawilung ‘S’ panpui leh an ni.