Aizawl; Relief camp a awm Bru chhungkaw 6,959 zinga chhungkaw 2,500 bawr vel te chuan Tripura a an inbenbelna tur hmun an luah fel tawh a, hetihlai hian Tripura sawrkarin chhawmdawlna an dawn tur ang a la pek kim loh avangin Mizoram electoral roll atangin paih theih an la ni lo.

Mizoram Bru Displaced People Forum (MBDPF) Gen. Secretary Bruno Msha hnen atanga ZALEN thudawn danin, Tripura a an inbenbelna tur hmun luah fel tawh te hi Gomati district ah chhungkaw 200 vel, Dhalai district ah chhungkaw 700 bawr vel, North Tripura district chhung, Khahamphaipara ah chhungkaw 370 vel, Hamsapara ah chhungkaw 200 vel, Kaskau ah chhungkaw 600 bawr vel leh Kanchanpur Sub Division hnuai Bandarina ah chhungkaw 400 bawr vel, an vaiin chhungkaw 2,500 bawr vel an ni.

Bruno Msha sawi danin, Tripura sawrkarin chhawmdawlna hrang hrang a kalpui mek a, inremna ziah anga chhawmdawlna dawng kim erawh an la awm lo.

Chief Electoral Office (CEO) Mizoram hotute sawi danin, relief camp a awm Bru te chu Tripura sawrkarin chhawmdawlna a pek fel hunah Tripura electoral roll ah thun an ni ang a, chumi hnuah chuan Election Commission of India (ECI) lam pawhin Bru te chu Mizoram electoral roll atanga paih an remtih nghal beisei a ni bawk a ni.

Kum 2020, January thla khan sawrkar laipui, Tripura sawrkar leh Bru pawl aiawhte chuan inremna an lo ziak tawh a, Bru refugee te chu an awmna tur ram ft 40X30 a zau pek tur a ni a, fixed deposit in Rs. 4,00,000 dahsak tur an nih bakah, kum hnih chhung thla tin Rs. 5,000 leh a thlawnin ration pek tur a ni.

Tun dinhmunah Tripura relief camp a awm Bru zinga Mizorama vote nei mi 11,772 zinga mi 8,885 te chu Mamit district ah vote an nei a, mi 1,979 in Kolasib district ah leh mi 908 in Lunglei district ah vote an nei.