ZALEN September 10, 2026: Tuialhthei zuartuten pawisa inchhuh luih kaihhnawiha an pump-te khar hial an tum chungchang chu zirlaiten sawi fiahin pawisa inchhuh luihna engmah a awm loh thu an sawi.

All Mizoram Petroleum Dealers Association (AMPEDA) hian Nilaini khan thuchhuah siamin tun hnaiah Mizo Zirlai Pawl (MZP)-in an member, LT Brothers Filling Station, Keifanga thawkte hnenah pawisa dilin an chhuh lui niin an tar lang a. An pawisa laksak hi an pe let lo a nih chuan karleh Ningani atanga Mizoram puma pump khar an tum thu an sawi.

Hemi chungchangah hian MZP chu Ningani khan thukhawm nghalin thu chhuah an siam zui a. September 23–25, 2026 chhunga Darlawna assembly an neih dawn thu leh hemi atan chuan LT Brothers Filling Station, Keifang chuan sum an thawh thu an sawi a, sum inpeknaah tihluihna emaw, kut inthlakna emaw engmah a thleng lo tih an tar lang.

MZP hian LT Brothers Filling Station hi Lalthanzauva ta a ni thin a, tunah chuanSandeep, Haryana hnenah an hralh tawh a, pawisa pawh inhlan fel vek tawh niin an sawi a, pump enkawl tur pawhin Nitesh an chhawr mek tih an sawi bawk.

Mizorama petrol pump tam takah Mizoten a hmun leh license nei mah se hnam dangten an enkawl a, Mizo hming hawha hnam dangte sumdawntir an awm tih an sawi bawk a, hengte hi a tul angin a en zui zel dawn tih MZP hian an sawi.

Assembly an neih turah chuan Mizo hming hawha hnam dang sumdawntir chungchang pawh an thu rel tur zingah, “Mizo hming hawha hnam dang sumdawntirte na taka hremna dan sawrkarin siam rawh se” tih chu a tel tih an sawi.

AMPEDA intiten petrol pump an lo khar a nih pawhin hnam dangten sumdawnna an kalpui ve lohna petrol pump neitu Mizote chu inkhar ve lo turin an ngen a, mipuite pawh hnam dangte sumdawntirna pump-te hnualsuat turin an ngen bawk.

Sawrkar pawhin dan dik lo taka sumdawngte dap chhuakin an sumdawn phalna tihtawpsak turin MZP chuan ngenna a siam bawk.