Tripura-a tlanchhe mek, Bru (Reang) te chu Mizoram ah hruaikir tum mek an niin Mizoram mi leh sa an nih leh nihloh enfiah hna pawh Nilaini kalta atang khan Kaskau camp ah neih tan a ni a, a ni khatnaah hian chhungkaw 90 vel an inlan a. Endik hna hi tluang taka thawh a niin Bru pawh an inlan tha hle. Ruahman dan chuan November ni 7,2016 atangin Khakchangpara camp-ah enfiah hna hi chhunzawm a ni dawn a, a hnuah Hamsapara, Asapara, Naisingpara leh Hazachera camp ah te enfiah leh an ni ang a. Mizoram khua leh tui dik tak te chu November thla tawp hian Mizoram ah hruai haw tum a ni. Sawrkar laipui ruahman angin Bru te hi tum engemaw zat hruaikir tum an ni tawh a, mahse enfiah tura inlan an awm thin loh avangin thulh a ni thin a. Vawi engemaw zat sawrkar laipui kaihhruaia meeting neih anih hnuah tun tumah hian Bru te hitha takin an inlan ta a, a lawmawm hle mai. Thangkhat lian zet mai Bru te hi Tripura ah hian an awm tawh a, in leh lo pawh nei lovin sawrkarin an tana hmun a siam ‘relief camp’ ah an awm a, a hrehawm viau ang tih pawh a rin theih a ni. Bru tlanchhia te hian chiang taka an hriat tur chu Mizoram bak chu hmun nghet an nei lo tih hi a ni. Tuna an awmna Tripura ah chuan mikhual mai an nih avangin an rilru pawh a bet tak tak thei lovang tih a rinawm. Mizoram a hruaikir chungchangah harsatna neuh neuh han awm thin bawk mahse tun tumah hian a hlawhtlinna hmel a lang tan hi thil lawmawm tak a ni. Bru te hian an hriat atana thil pawimawh tak chu Mizo mipuite hian an hmangaihin an khawngaih a ni tih hi a ni. A pawng a takin an chung-ah Mizote hi an sual lo a, inngeih tlang taka khawsak ho dial dial hi Mizote hian an duh a, chumi kawngah chuan kawhmawh bawl zawng ni lovin thuhnuairawlh leh thuawih taka an awm thiam a pawimawh. Hun kal tawh ah te Human Rights leh Delhi tlang lamah te diklo taka hekna te a awm thin a, an nula te pawngsual ang te, an temple te tihchhiat sak ang leh thil dang dang ten Mizote puhchhiat an ni tawh thin. Heng thu diklo hmanga inpuhchhiatna leh kan inhnaihna tur tichhe zawnga thiltih hi tun hnu ah chuan awm tawhlo se. Chuti ni lova inlahrang leh inhek zawnga an khawsa anih chuan boruak thalo a awm leh thei a ni tih hriaa thuawih an zir ve a pawimawh a. Khua leh tui tha, ram neitute nen inrem taka khawsak ho hi zir thar se a lawmawm ngawt ang. Mizo mipuite hian Mizoram mi leh sa diktak te chu an lo let hi an duh reng a, an lo lawm reng a ni. Tuna enfiah hna kalpui mekah pawh hian dik taka thiltih nise, Mizoram mi leh sa dik tak te chu laklet ngei tur a ni a, hetih lai hian Mizoram mi leh sa ni lo ten remchang ah an hmang thei a ni tih hria a sawrkar leh enfiah hna thawktute pawh an fimkhur a tha hle. Bru laklet ah hian kan fimkhur loh chuan Mizoram mi leh nilo engemaw zat kan senglut thei a, chuvangin endiktuten huai tak leh fimkhur takin hma han la teh se.