BRUNA ALEXANDRE: Paralympic leh Olympic Games-ah inlan kawp dawn
![](https://zalen.s3.ap-south-1.amazonaws.com/images/news/1718100843_tt.jpg)
Fuke kima piang tan pawh Olympic Games-a inlan hi thil namen a ni lo. Brazilian table tennis player Bruna Alexandre-i chuan a hlen chhuak dawn thung.
Nausen mai a nih laia a ban ding lam tansak ngai, Alexandre-i chuan, “A chang chuan theih loh angin lang thin mah se Pathian remruat hi dal theih a ni ngai lo,” tiin a sawi.
Alexandre-i hi Brazilian infiammi zinga Olympic leh Paralympic Games-a inlan kawp thei hmasa ber a ni dawn.
Brazilian Table Tennis Confederation chuan bân lehlam chauh nei ni tawh mah se Paralympic medal pali zet awrh tawh hi kumin Paris Olympics-a an ram aiawha khel turin an thlang tih Thawhtanni khan a puang a ni.
“Nausen ka nih laia ka bân min paihsak atang khan ka nu leh pa hi an tap tawp thei lo va, tunah erawh chuan inchhuang takin, he ka hlawhtlinna hi anmahni nen kan changho thei ta,” tiin a sawi.
Nilaini khan a Instagram-ah Alexandre-i chuan, “Thla hnih mi lek ka nih lai atanga ka chunga harsatna awm hi inbawihtir ka tum ngai lo va, tunah chuan Brazil atanga Olympic leh Paralympic Games-a inlan kawp thei hmasa ber ka nihna chu min hmangaihtute nen zai leh tap chungin kan lawm thei ta!” tiin a tar lang.
Alexandre-i hi nausen a nih laiin a thisen khang avangin a ban ding lam tansak a ni a, nikum khan bân lehlam chauh nen Santiago, Chile-ah Pan-American Games-ah a inlan.
Kum 29 mi hian South African runner Oscar Pistorius leh Polish table tennis player Natalia Partyka te hnung zuiin Olympic leh Paralympic Games-a inlan kawp thei a ni ve dawn ta.
Partyka-i hi table tennis chanchina Paralympc-a inlan thei naupang ber niin Sydney 2000 khan kum 11 mi lek a nih laiin a tel tawh a, a hnu kum riatah Beijing-ah Olympics leh Paralympics-ah inlan zuiin table tennis atanga inlan kawp thei hmasa ber a ni.
“A career-a Natalia Partyka-i thil tawn kha min tichaktu ber a ni,” tiin Alexandre-i pawhin kumin kum tir khan a lo sawi tawh a. “Amah kha hneh ngei pawh ka tum a, nikum khan ka hlen chhuak ta nghe nghe a. Tunah pawh ka entawn a la ni zel a, table tennis-a hetiang chanchin bul tantu niin ka ngai a ni,” a ti.
Alexandre-i hian 2016 Rio Paralympics-ah khan bronze medal pahnih lain Tokyo 2020-ah khan maltanah silver leh team-ah bronze a la tawh bawk.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024