Narendra Modi-a Sawrkar chuan pawisa lem leh thupbo tihrem a nih theih nan hrilh lawk awm lovin Rs 500 leh Rs 1000 note a rawn ti hlum vek mai a; State sawrkar pawh inhriat lawk tirna a awm loa, media hriatlawk a ni bawk lova. Hetiang ang hi vawi khat a thlenna a ni a; Sawrkar lamin 'chi ai lo' turin ti ringawt mahse mipui nunphung a buai miau chuan min nghawng a, damlo leh midang tam takin an tawrh phah a, nunna chan te pawh an awm phah tawh hial a report a ni nghe nghe a ni.
Eng ang takin nge nghawng a neih dawn tih hi tumahin an hre bik lova, mithiamte pawhin an rin thu bak an sawi thei lo. Reserve Bank of India chuan Bank lamah kaihhruaina mumal tih chhuah a ni a; chutih rualin darkar tlemte chhungin tihdanglam a ni nghal pang a. Bank leh bank inkara pawisa pek chhuah zah in ang khat lo chu thuhran nise mi pakhata pek zah tur bituk pawh a khai rual hlei thei lova; Rs 4000 chu Rs 2000 ah a tla thla a, zia lam pan aiin tihtlem a la ni zel a ni. Chutih rualin sum thleng theih a nih hun chhung pawh pawhsei a ni ve leh zel thung bawk a ni.
Thutlukna siam hrim hrim hian nghawng tha leh chhia a nei lo thei lova, vawi leh khata thil tih danglam tum (abrupt change) phei chuan nghawng tha lo tak a nei fo thin reng a. Chutih rualin dan kalha sum thupbo; chheprelh, pawisa lem virvel leh a dangte chuan ram pum economy a uai bet tawh tak zeta rik rup a tul nia hriatna atangin Central Sawrkar pawhin hma a la lo thei lovah ngai ila.
He thil thlengah hian titi leng vak sawi neuh neuh a awm nual theiin a rinawm a. Sawrkarin note 2 a tih thih hnua darkar 72 ral hmaa la hmanchhunzawm theihna tura a tih a bikin mipui mamawh zual Sawrkar damdawi In, tuialhthei lakna hmun leh hmun dangte in mipui an dawnsawn dan hi thil pawimawh tak a ni. LPG Ministry lamin thuchhuah an siam tawh hnuah pawh Gas semtu thenkhat chuan mipui atanga Rs 500 leh Rs 1000 note la duh lo nghal an awm pang mai a; Social media ah pawh a darh hman a nih kha. Sawrkarin note a tih thih 2 dawng chhunzawm tura a tihluih kher loh sumdawng lian a tein zingah thenkhat chuan mipui buaina siam ai chuan theih chen chen an dawn sak a; a then dawn sak thei lo te pawh an awm a, sawi hlawh viau mahse 'note' te zawk virvel tur Bank lamin pekchhuah tur a neih si loh chuan fan tawp te pawh awm ve thei tho a ni a. A dawrtute lam pawhin pawisa tih nawina rilru an nei em ni? tih theih a ni tho mai. Mipui beisei phak loh te awm theih a ni bawk a; hemiah hi chuan mi pangngai chin chuan ngaihdan an siam thiam mai turah a ngaih theih awm e.
Mi zawng zawngin tunah hian harsatna kan hmachhawn veka, mi lian leh a rethei inthlei bikna awm lovin mahni zawn theuhah tih tur rinawm taka tih mai hi mitin mawh a ni zawk a ni. Mihring kan nihna anga inzah tawn leh inpuih tawn theuh tum thung ila harsatna insiam chawp theih lakah engnge maw chen chu kan fihlim thei ang.
Engpawh nise pawisa note vir tam ber tih thih a nih chuan buaina leh harsatna namenlo awm tura beisei tur a ni a; indem tawn mai lovin a dem tur dik tak thil dik lo titute dem rawn hi mipui tih tur zawk a ni ang.