Aizawl March 4, 2024 : Vawiin hian Mizo Hnam Run-ah Mizo National Day vawi 58-na hmanna hun leh MNF General Hqrs. Elected office Bearers thlan tharte puanchhuahna hun hman a ni. MNF President Zoramthanga chuan buai thlen chhana mawhphurtu chu India sawrkar a nih thu a sawi.

Zoramthanga MNF President chuan thusawiin, "Mizo hnamin zalenna nei tura kan beih tanna ni kan lo thleng leh ta hi a lawmawm tak zet a ni. Pu Laldenga leh khatih lai MNF hruaitute khan buai pumbelh hram an tum a. Mahse, Assam CM PB Chaliha chuan inbiak a duh tawh lo a, sipai a rawn tirh luh tak avangin silai a puak ta a ni," a ti a. Silai puah chhana mawhphurtu chu India sawrkar a nih thu a sawi bawk.

Zorama chuan, "Mizo hnam nationalism hi thisena baptist tawh a ni a, chu nationalism kengtu chu MNF Party a ni. Party dang ang kan ni lo a, Pathian leh kan ram tan, tia kan din tlatna hi kan felnaah Pathianin a ruat a. MNF hian hniam lai chu a nei ngei a, mahse, Pathian hruainain a tho kang leh thin a ni," a ti a. "MNF hi Pu Laldenga emaw Pu Zoramthanga emaw awihnun a ni lo a. Mizo hnamte hi khawvel hnam ti zinga Krista chanchin tha hril tura koh kan ni a, chumi tura he ram leh he hnam buatsaih hi MNF dinchhan leh tum bulpui ber a ni," a ti bawk.

"Mizo Union te, PC Party te an lo ral tawh a, Congress pawh an hniam ta hle. MNF erawh chu kum 60 chuang Pathianin hun harsa leh khirh tak karah pawh min hruai zel a ni," a ti a. "ZPM pawh hnatlang party an nia, belkeh phuarkhawm ang mai an ni a, an kehdarh chu a nasa viau ang," MNF President chuan a ti bawk.

He hunah hian MNF General Election Returning Officer Dr Zoramdinthara chuan kum 2024 - 2027 MNF General Hqrs. hruaitu (Elected OB) atan heng mite hi tlingah a puang:

President: Zoramthanga

Sr Vice President: Dr R Lalthangliana

Vice President: Vanlalzawma

Vice President: Lalchhamdama Ralte

Treasurer: Lalruatkima

He hunah hian hruaitu thlan thar te - Sr Vice President Dr R Lalthangliana, Vice President Vanlalzawma, Vice President Lalchhamdama Ralte leh Treasurer Lalruatkima ten thu an sawi bawk a ni.

Martar-te sunna hun hman a ni a, Rev Lalzuithanga'n tling tharte Pathian hnena hlanna a nei a. Inkhawm hi Pu Tawnluia Sr Vice President-in a kaihruai a ni.