- Dr. Jane R.Ralte State Nodal Officer (Tobacco Control) Mizoram State Tobacco Control Society THUHMAHRUAI: Kan sawi zing viauin kan hre hnem viau ta pawh a ni mai thei. Amaherawhchu, thenawmte hnenah emaw tu te chhungkuaah chauh emaw thleng tura i ngaih thin khan i in chhungkhur ngeiah a rawn thlen ve hun a awm ngei dawn. Chu chu nghah thlen kher i tum nge, i in veng zawk dawn? Kan in leh lote a min mai loh nan, tuiluankawrte tha takin kan siam a, lungte kan rem thin a nih kha. Mahse, chung chu ngaihthahin a min chiam tawh hnu a harsatna a thlen tur zawng zawng a thlen tawh hnuah, silpouline khuhin han zar leh ta la, a min hmaa tha taka i enkawl nge a min hnuah buaipui chiam kha tangkai zawk ang? ti hian bul kan tan teh ang. I ngaihtuahna hmun dangah dah peng loin, nangmah leh i chhungkaw tan a pawimawh a ni tih hriain, i ngaihtuah zui tur Vaihlo (Zuk leh Hmuam) chungchang rilru tharin i’n zirho leh teh ang u. Kan hriat tlan angin veng chhung mai ni lo, khaw khat pawh ni mai loin India ram pumah Pakhatna nih hi thil har tak zawng a ni ngei ang; amaherawhchu, a tha lo zawnga Pakhatna Vaihlo (Zuk leh Hmuam) hman tam lama kan ni thei hi inchhuanna tur chu a ni lo tih kan chiang tlang awm e. A mawh tunge phur? HRISELNA A NGHAWNG DAN: Vaihloin a tur pai tam tham tak avanga harsatna kan tawh theih hrang hrangte zingah Cancer hi kan hre lar ber awm e, hemi piah lamah hian kan taksa tan a harsatna hrang hrang - chuapah, lungah, thluakah, thisen zamah leh taksa peng thenkhatah te a thlen thei a ni. Tin, nuin nau a pai laiin zuk leh hmuama a insum loh chuan nautein harsatna an tawkin – naupiang zâng lutuk, nau thisa a hrin, nausen chhan hriat loha thih thutna te a thlen theih bakah hmeichhiain naupai thlengin harsatna an tawh phah thei bawk a ni. Kan inchhung khurah puitlingten mei kan zuk nasat hian kan hmangaih kan fanaute harsatna tam tak kan siam a ni tih pawh hi kan hriat chian a hun ta tak zet. Minute khatah puitling hian thaw hi vawi 16-20 inkar vel kan la tlangpui a, naupang chuan a let eng emaw zatin thaw an la tam a ni. He mi awmzia chu i meizuk khu zam vel kha eng emaw zah naupangten lo hip lut vein, chu chuan naupangah chuap tha lo, Ashtma, khuh benvawn, lung tha lo bakah harsatna hrang hrang a thlen thei a ni. Kan chenna kan hmangaihte nen hun kan hmanna hmun hi engah nge meizuk khu awm lohnaah kan siam theih loh ang? Hetianga kan ti thei ngat a nih chuan inchhirna i nei ngai lo vang, inchhungkhur a lo zahawm ang a, i fate hriselna mai bakah chhungkaw tan pawh hlawkna tam tak a awm ngei dawn a ni. Mizoramah zirtirna nasa taka kalpui mek a ni a, la kalpui zel tum pawh a ni na chungin, a lo dawngsawngtu mipuiten kan zirchian ve hi a tul tak zet tawh a ni. Hetiang harsatna hi a thleng thei a ni tih pawm tak taktute chuan sim duhna thinlung puin an duhna chu an puitlin thin. Nu leh pa, pi leh pute kum upa lamten kan lo tirei tawh si a, sim kan tan awmzia awm tawh lo an ti thin, vaihlo sim hian tlai luat a nei lo va, i sim ni la la atangin hlawkna tam tak i tel nghal dawn a ni tih inringhlel hauh suh ang che. Mihring siam that nan khawdur a ngai tih hi kan hre theuh awm e; amaherawhchu, khawdur lo thlen nghak kher lo hian mi mal tinte kan insiam thain kan inveng thei a ni tih hi hriat a tha khawp mai. Mizote zingah heti tak mai a Vaihlo (Zuk leh Hmuam) kan uar mai hi zirchian tham tak a tling ngei ang. Kan chhuanlam tam takte hian addict (Ngawlveina)-ah min luh tir ta si a. Khang hun hmanlai kan pi leh pu ten ram hna an thawh lai a an lo chin than a kha, tunah erawh kan paih thlak a hun tawh hle a ni. THIANGHLIMNA LEH VAIHLO: Pathian hian thianghlimna hi a ngai pawimawhin a mite hi thianghlim tur hian min duh takzet a ni. Bible in thianghlimna min kawhhmuh dan chu thil dang thianghlim lo lak atanga inla hrang tur leh chung chu a deh pawh dek lova, chuta ta chu chhuak turin min ti a ni. In thianghlim tur a ni, kei ka thianghlim si a, a tih angin kan taksa pawh hi thianghlim taka enkawl a tul hle a. Pathian nung Biak-In, a taksa tana a hman mihring te hi Vaihlo hian min ti chhe nasa em em a, kan hmel hmai te pawh a ti nalh lo em em a ni. Tirhkoh Paula’n ‘thil engkim tih ka tan a thiang a, nimahsela thil engkim tih a tha kher lo…’ (1 Kor. 6:12) a tih angin a hmasa berah chuan kan duhzawng leh chak zawng apiangte hi kan tan a tha vek kher lo va. Zuk leh hmuam pawh hi amah mai chuan sual a ni kher lo; mahse, min tihnawktu leh kan tana tangkai lo a nih piah lamah taksa tana hrisellohna thlen theitu a nih tlat avangin kan tihloh mai a tul a ni. Petera lehkhathawn pakhatnaah chuan nun thianghlim nei tura sawmna kan hmu a, min kotu min tlanchhuaktu Pathian a thianghlim angin keini pawh kan chetzia zawng zawnga thianghlim turin min ti a, ‘Nangni in thianghlim tur a ni, kei ka thianghlim si a,’ Lalpa’n a ti a ni (1 Pet. 1:16). Zuk leh hmuam chi hrang hrangte hi mimal leh chhungkaw tana thil tullo, sum leh pai ti hek em emtu leh kan discipline thlenga min tihnawktu a ni a, chu mai bakah hriselna tichhe thei, nun titawitu a ni a. Ringtute tan phei chuan Krista hmai tibaltu chi khat a ni thei a, hnam dangte phei chuan drugs chi khatah pawmin ringtute tan chuan tih loh tawp turah an ngai a ni. Ringtu Kristian leh Kohhran mite hi Pathianin kan nih ang ngeiin Pathian thlarau chuan min chenchilh reng avangin min tibawlhhlawh leh min tihnawk thei thil apiangte paih ila, Tirhkoh Paula min zirtir angin inthawina nung leh thianghlim leh Pathian lawm tlak ni turin kan taksa hi I hlan ang u. TLANGKAWMNA: Kan pawm dan te, kan ngaihdan te a in ang vek kher lo ang, amaherawhchu, mi thiamte zirchianna te hi chhiarin en tam ila, lehkhabuah te, Chanchinbuah te, TV-ah te, Radio-ah te emaw internet-ah te zirchiang ila kan ngaihdan nghet neihsa thawk leh khata sawh sawn dawrh a har a nih pawhin, chumi i hriatna chuan thil tha zawk a kawh hmuh thei ngei ang che. Tun dinhmunah zirchianna hrang hrangah Vaihlo hian hriselna a khawih pawi tak zet, kan hrisel loh chuan kan rawngbawlna leh hnathawhna kawng hrang hrangah tangkaina kan nei lo tial tial ang. Kan hlut em em kan dumbur te chu dah bova rilru leh taksa hrisel tak nen a thianghlimna kawng zawh tur leh Mizoram hmel thar a lan chhuah ngei theih na tur a tan theihtawp i chhuah tlang theuh ang u.