Buhfai chawkluhnaah harsatna awm lo; thla thum daih buhfai chhekkhawl sa awm

Admin - Jul 18, 2021

Mizoram chhung hmun 53-ah buhfai chhekkhawl

Aizawl; Food Civil Supply & Consumer Affairs (FCS&CA) minister K. Lalrinliana chuan Mizorama buhfai chawkluhnaah harsatna a awm lo tih sawiin, tun dinhmunah thla thum daih buhfai chhekkhawl sa Mizoramin a nei tih ZALEN a hrilh.

Supply minister chuan ZALEN zawhna chhangin Mizorama buhfai chhekkhawl zat chu a chiah chiah chhut a har tih sawiin, tun dinhmunah chuan FCI-a neihsa te, Prime minister package neih mekte nen thla thum daih buhfai chhekkhawlah an inngai tih a sawi a, sawrkarin ruahmanna a lo siam tawh angin Mizoram chhung hmun 53-ah buhfai chhekkhawl a nih thu a sawi.

Kawng that lohna hmun leh kawngpui siam that mekna hmun eng emaw zahah chuan kumin September atanga November thla thleng daih tur buhfai chhekkhawl tawhna hmunte pawh a awm tih sawi bawkin, hetihlai hian kawng thatna hmun leh lirthei veivahna a harsatna awm lohna hmunahte chuan buhfai chhekkhawl a ni lutuk ngai lo niin a sawi.

Supply minister chuan tun dinhmuna Mizoramin thla khata buhfai a mamawh zat chu quintals 1,05,000 ang vel a ngaih a nih thu leh hei hi chhan hrang hrang vanga a danglam reng thu sawiin, tun dinhmunah Mizorama buhfai chawkluhah harsatna a awm loh thu leh labour atanga driver, owner leh company lam thlengin thawhhona an neih that thu a sawi.
 

Ration semna atana e-PoS machine hman chu central sawrkar thu a ni tih sawiin, supply minister chuan thla hmasa lam khan harsatna hrang hrang neite chu hriatthiamna a rawn pek thu leh tun dinhnunah erawh thuthar a la awm loh thu a sawi a, e-PoS machine chu India ram a buhfai bothlau tam lutuk venna a nih thu a sawi bawk.

Share now