Aizawl May 27, 2024 : Vawiin khan ZPM Party Office-ah chhûng inkhawmna hun hman a ni a, thusawitu B. Lalchhanzova, Minister of State chuan, ZPM sawrkar hnuaiah Buhfai lei dan phung siam that a ni a, Zo buh thar (Buhhum) pawh lei an tum tih a sawi.

Food Civil Supply & Consumer Affairs chungchâng sawiin Minister chuan, "Dinhmun harsate'n an chanvo an chan theih ngeina turin ration card ennawn hna hi thawh chhoh zel tum a ni a, mipuite'n buk tling leh dik taka buhfai an khul theihna turin ruahmanna siam mêk zel a ni, kum nga kalta chhûng khan hriat theih chinah tender hmanga buhfai lei a awm ngai lo a, mipui mamawh aia tam buhfai phurh luhte pawh a awm thin a, ZPM sawrkâr hnuaiah erawh buhfai lei dan phung siam that a ni; a sem danah pawh dik zawka kalpui tura ruahmanna siam mêk a ni a, retailer-te dinhmun ennawn a, an lawmman-te pawh tihpun tum niin, buhfai buk dik zawka an hralh theihna tura ruahmanna siam mek a ni," a ti.

B. Lalchhanzova chuan a department chan puala hmalâkna kal mêkte tarlangin, "Retailer-te buhfai sem bâng hralh kan remtih tâk loh avângin a lo berah kum khatah buhfai quintal 80000 vel, a pawisa a zawngin Rs. Vaibêlchhe 70 vel hum theih kan inbeisei a, Zo buh thar (Buhhum) pawh lei kan tum. Tin, Mualkhang Bottling Plant thar thawh leh tura hma lâk chhoh mêk a ni a, Oil Depot nei turin tha thlah lo a hma lâk mek a ni," a ti. "Ram teh leh a kaihhnawih hna muang lutuk thin tifel turin Survey Outsourcing ti tura hmalâk a ni a, complaint box-te siam niin lungawilohna leh rawtna nei chuan theh luh zêl theih a ni," a ti bawk.