Aizawl : Food & Drugs Administration, Mizoram chuan tunhnaia Champhai a buhfai lem nia sawi Suraj premium grader rice chu zuarchhuak tawh hrih lo turin an ti. 

ZALEN in Food & Drugs Administration a Deputy Food Safety Commissioner Lalsawma hnen atanga thu a dawn danin tun dinhmunah chuan buhfai lem a nih leh nih loh sawi mai theih a la ni lo tih sawiin phai lama endik nawn hnuah chauh a dinhmun a hriatchian theih dawn niin a sawi. ZALEN thudawn danin Champhai-a buhfai lem nia sawi hi Aizawl a Food Testing- Laboratory-ah endik anih hnu ah han rinhlelhna tur hmuh ani lo a, mahse state danga Food Testing Laboratory-ah uluk zawka endik nawn a ni dawn.

March ni 30,2022 khan Champhai Venglai Presbyterian kohhran chuan an kum 40-na Ruby jubilee lawmna atan ruai an buatsaih turah dawr atangin Suraj premium grader rice hi an lei a. Mahse an chhum tur tuia an chiah chu a lang luau luau mai a, buhfai pangngai chu tuia chiahin a pil mai thin a. Hei vang hian a lem nia rinhlehna a lian hle a. Buhfai hi a hmin chuan khawihin a pherh thin a, mahse he buhfai erawh hi chu a pherh loh mai bakah a fan thei a, hei hian rinhlelhna a siam avangin thuneitu sang lamah enfiah atan thlen a ni ta a ni. 

Food & Drugs Administration a Deputy Food Safety Commissioner Lalsawma buhfai lem nia sawi hi mihring hriselna khawih chhe thei leh chhiatna nasa tak thlen thei a ni tih finfiah anih chuan state tina food safety te an inhrilh darh ang a, khawi state atanga lo chhuak nge anih tih te zawnchhuah tur anih thu leh hetianga himlo a siam an awm chuan hremna pawh a san thu tunhnai khan amah kawmtu chanchinbumite a lo hrilh tawh a ni.