Aizawl; August 4, 2021 chawhma dar 10:30 vel a Bru hel nia rinten an suam nia 
sawi, Bungthuam tlangval Lalmuanawma Ralte s/o R. Lalrintluanga suamtute chu 
man an la ni lo a, he thil thleng chungchang hi Kanhmun police ten ngawrh takin 
an chhui mek ni a thudawn a ni.

Bungthuam atanga ZALEN thudawn danin, Kanhmun Police Station ah 
FIR ziahluh a ni a, police lamin thu zawhfiah mi engemawzah an nei tawh a, 
Kawrthah SDPO pawhin insuam thlenna hmun nia sawi hi tlawh tawhin thil 
awmdan a enfiah tawh. He thil thleng hian mipui a ti ralti deuh a, a bik takin 
Zawlnuam leh Kanhmun lam a bank dawr turte phei chu mahni pawhin an kal tha 
ngam meuh rih lo.   

Bungthuam Branch YMA chuan thuchhuah siamin, Lalmuanawma 
Ralte, Bungthuam, Mamit district chu August ni 4, 2021, Nilaini chawhma dar 
10:30 - 11:00 inkar vel khan, Kanhmuna dawr bungraw la tura Bolero hmanga a 
kal chu Bungthuam leh Luimawi inkar, Goboi lei thlen hma deuhah hmai tuam 
pali, Mizo tawng pai, silai keng ten ti dingin, Rs. 28,450 an chhuhsak tih an sawi.

Mizoram chhunga insuamna thleng chu an dem tih tarlangin, 
Bungthuam Branch YMA chuan thil sual titute chu Mizoram sawrkar leh police in 
chhuichhuak a, hrem ngei tura an phut thu an tarlang.