DOWNLOAD OUR APP

Read latest news on your phone
play-store app-store
app-store
Bureaucrat & politician
Editorial
Aug 16, 2014
ad
Chief Minister Lal Thanhawla chuan sawrkar Secretary te chu lehkha thawnin department an chan theuh tih changtlun nan rawtna thehlut turin a hriattir a, Secretary te chuan department pakhat tan a tlem berah rawtna 7 zel an thehluh a ngai dawn a ni. CM hian hun tiam siamin August ni 5 hmaa thehlut turin a hriattir bawk a, Secretary thenkhat chuan hun tiam chhungin an thehlut hman loa nghah ngai te pawh an awm a ni. CM hmalakna hi bawhzui chhunzawm a nih chuan thil tha tak tur a ni a, sawrkawr inrelbawlna pawhin hma a sawn dawrh a beisei awm. Bureaucrat leh politician inkar hi fimkhur ngai tak mai a ni a, bureaucrat te chu chawlh awm loa an pension thlenga sawrkar enkawltute an ni a, politician thlan tlin te chu dan chhungah rawng an bawl sak tur a ni. Minister te an chak lo a nih chuan bureaucrat te an in luling thei a, secretary te an chak tawk loh chuan minister te’n an thuneih na an hmang sual thei bawk. Gujarat-ah khuan IAS Mizo a awm thin a, Narendra Modi CM a nih lai khan department pawimawh hlir chan tir a ni thin a, Mizo min ti hmingthaa amah pawh a chhuanawm hle. Kan bureaucrat te hi state danga an awm chuan officer tha tak tak an ni thin a, Mizoram an rawn chhuah pawhin hna tha tak thawk tura beisei an ni. Hetiang hi an tlin lo a nih chuan kan minister te thiam loh a ni thei em? tih zawhna awm a ni. Minister te hian Secretary te nena an inkar an vawn thianghlim a pawimawh a, sawrkarna an chelh chhung chu an aia lehkha thiam zawk pawh ni mahse an thu hnuaiah an dah tur a ni. Office zahawmna tibawrh bang zawnga an kawm a nih chuan ‘discipline’ an kengkawh thei ngai lo ang. Politician te hi kum 5 chhung office chelh tura thlan an ni a, bureaucrat te chu an pension hma thawk tur an ni zawk a, a nihna takah chuan sawrkar an ni mah zawk a, ram hmangaih rilru pua hnathawk tur an ni reng a ni. Politician te chuan policy an siam anga, bureaucrat te chuan dan chhungah an ti hlawhtling tur a ni thung. Narendra Modi chuan Prime Minister tura lakluh a nih hnu lawk khan sawrkar secretary rual te chu hmaichhanah a ko khawm nghal a, sawrkar kalphungah an rawtnate ngaithlain bawhzui a ni nghal bawk a ni. Kan CM in hetiang anga hma a la hi a lawmawm hle a, minister te kaltlang ngai kher loa secretary te thuneihna thar pek an niih hian phur tharna a siam tawn mahna. Chutih rualin CM in rawtna thehlut tura lehkha a thawn hnu pawha Secretary thenkhat te’n hun tiam chhunga an la thehlut thei lo te hian ngaihtuah a ti thui duh e. Eng pawh nise rawtnate hi ram hmasawnna tur a nih ring ila, a luh kim hunah CM pawhin chak taka a bawhzui a ngai dawn a, politic-a hmingthatna niloin a taka a chan tir ngei a tul a ni.

Latest News & Chhiar Hlawh