Aizawl; Mizoram sawrkarin 'Mizo Hnam Project' tih vuah a hma a lakna Bairabi - Zamuang - Kanhmun (BZ road) chu thuam that mek zel niin, tun dinhmun ah zawhfel la ni chiah lo mah se, Assam lama Mizoram mamawh chawkluhna kawngpui pawimawh dan a nih pawhin bung-raw chawkluhna atan harsatna awm lova zawh theih turin thuam that thawkhat tawh a ni.

ZALEN thudawn danin, BZ road thuam that mek ah tun dinhmunah chuan kawng ping leh buai a awm tawh lo a, contractor Lalhmachhuana Fanai, Tlangnuam, Aizawl chan Bairabi (Zero) - km 14 chin ah fur in a nan hman vangin, km 3 bawr vel blacktop loh a la awm a, GP project private Ltd. ten an chan lam km 14-27 chu zawh fel ni tawhin, blacktop zawh hman loh, km 3 bawr vel ah pawh lung phah chhuah vek a ni tawh a, lirthei veivak tan harsatna a awm lo.

BZ road - Kanhmun ah hian Langkaih lei leh Teirei lei awmin, chung lei dawh pahnih te chu bungraw phur, metric ton 20 (24R) zawh theih turin thuam that a ni ve ve tawh a ni.

ZALEN thudawn danin, Mizoram in Assam atanga bungrgua a chawkluh theih chuan BZ road hi a lun lutuk lo a, Langkaih balu phurhna kawng pawimawh tak erawh niin, Mizoram mamawh bungrua leh chakkhai dang lakluhna atan chuan hman tam a ni lutuk rih lo.

"Assam lamin kawngpui dang mah se, hlet dang kan nei tih an hre tawh a, chuvangin helai kawng hi Mizoram tan a tha em em a ni," thudawnna chuan tiin, "Thui deuh zawk mah se, a kawng a tha tawh a, harsatna awm lo in Mizoram mamamawh kan chawlut thei tawh," a ti bawk.

BZ road - Kanhmun hi Tripura atanga Mizoram in bungrua a  chawkluhna kawngpui pawimawh tak tur niin, Bairabi (Zero point) atangin Tripura chu km 57 bawr vel a ni.