Aizawl: Chakma Autonomous District Council (CADC) hnuaia village council (VC) inthlanpui leh Lai Autonomous District Council (LADC) hnuaia Council Veng VC seat khat hnawh khah nana by-election chu tluang taka neih zawh a niin MNF chu party mala seat la tam ber an ni.

CADC hnuaia VC 88-a inthlanpuiah hian seat awm zawng zawng 516-ah Mizo National Front (MNF)-in seat 372 lain, khaw 65-ah hnehna an chang a; Bharatiya Janata Party (BJP) chuan seat 115 lain, khaw 16-ah hnehna an chang a; Independent candidate-te'n seat 27 lain, khaw 3-ah hnehna an chang a; Indian National Congress (INC)-in seat 2 an la a; chak ber awm lohna (no majority) khua 4 a awm bawk.

CADC hnuaia polling station pariat tih lohvah chuan tlai dar 4-ah poll khar vek a ni a. CADC hnuaia inthlan kalpuina polling station 82-a voter 31,112 awmah a zavaiin vote 26,915 tlain, vote tla zawng zawng hi 86.51% a ni a. LADC hnuaia Council Veng polling station-ah tlai dar 4-ah poll khar fel theih niin, voter 1,298 awmah vote 808 tlain, vote tla zawng zawng hi 62.25% a ni.