Cricket Association of Mizoram (CAM) chuan an mamawh em em ram a dawng leh ta a, a thlawna vaibelchhe tel man tur a dawn hi kum thum kum li hnuah inkhelhna atana hman theih ngei tura peih hman a tum.

CAM hian kum 2005 khan Sihhmuia ram zau tak chu a thlawn bawkin F.Rotluanga (L) chuan a lo pe tawh a, khelmual tha tak dinin kum 10 dawn hnuah Rs. Vaibelchhe 18 vel sengin inkhelh theihin an peih.

‘Suaka Cricket Stadium, Sihhmui’ tia a hming an vuah tak khelmual hian Ranji Trophy, Duleep Trophy leh kum bithliah hrang hranga khel thei cricketer eng emaw zat a lo chherchhuak tawh.

Tunah hian Lalrochuanga Pachuau te chhungkua chuan Tanhrila an ram chu khelmual atan an pe leh ta a, Thawhtanni khan a hmun hi sam faiin excavator pahnih hmangin nawr zawl hna an thawk tan.

Sihhmui khelmual an buaipui lai khan CAM hi Board of Control for Cricket in India (BCCI)-a la inziak lut (affiliate) lo a la ni a, anmahni pualin an sa zo vek a, sum dap chawp zel an nih avangin a sak hna pawh an thawk rei a. Tanhrila mi erawh BCCI atanga sum awm sa a ni dawn a, rang zawka peih theih an inbeisei.

CAM president ni mek, Lalrochuanga te chhungkaw ram pek an bawhzui dan tur chungchangah hian CAM-a Women’s Cricket Committee hotu, Chawngroliana (Patea) chuan, “Sum (funding) awm sa a ni a, hna a chak theih kan beisei,” a ti.

“Theihtawpa chakin kan ti ang a, sawi lawk theih ni lo mah se kum thum kum li-ah chuan inkhelh theiha peih hman a nih a beiseiawm,” a ti.

Suaka Cricket Stadium sak laia a buaipuitu ber pakhat, Patea chuan Mizorama cricketer-ten Sihhmuia mi chauh chu an indaih lo hle tih a sawi a, hei vang hian tuna a thar an neih tur pawh a tahtawlin, inkhelh theih tura peih vat an tum thu a sawi a. “A pitch bik kan tifel ang a, a bak gallery te, stand te leh thil dangte chu a tahtawlin kan ti ang. Tunah rih chuan khelhna hmun tur neih thuai hi kan rilruk ber a ni,” a ti.

BCCI-in kalphung a neihah state association-te hi khelmual sakna tur sum a tumsak thin a, a hmun erawh a ngaihtuahsak ngai lo va; association emaw, state sorkarin emaw a lei a thin a. Hei vang hian CAM pawhin khelmual siamna tur hmun a ngaihtuah nasa a, a dap nasat hle laia an president-te chhungkua an lo lang ta chu a lawmawm tak zet tih Patea chuan a sawi.

“CAM din tirh atanga tun thleng ka ngaihtuah hian a mak a, a ropui bawk. Hetiang em ema kan vanneihna hi chung lam Pathian duhsakna kan dawng a ni. Lalpa hian keiniho tan hian mi tha a rawn tir leh ta a ni,” tiin a sawi.

Patea chuan Tanhrila an khelmual sak tur chuan Sihhmuia mi tiat phak dawn lo mah se cricket khelmual pangngai tiat (cricket khelmual zawng zawng hi a intiat thlap thlap lo) leng tur tho niin a sawi.

CAM hian cricket khelhna tur hmun hi Aizawl khawpui chhunga khelmual awm sate pawh siam rema hman theih tura cheibawl tur a dap reng a. Hemi atan hian hmun hnih hmun thum thlithlai pawh an nei a; mahse, chianga sawi theih erawh a la awm lo tih a sawi bawk.

Hei bakah hian district dangah pawh khelmual tur hmun hi a dap reng niin a sawi bawk.