Aizawl: Hmarchhak bial mipuite puala Cancer chungchanga leh a inven dan inzirtirna NEC-Pink Chain Campaign 2019 buatsaih meka programme pakhat, cancer chungchang sawihona chu nimin khan Aijal club-ah neih a ni a. He conclave a khuallian Larsap chuan, “Cancer hi Mizoram mipui zawng zawngten kan hriatchian a, kan inzirtir tawn reng a pawimawh hle a ni,” a ti.   Conclave hmanpuitu Governor Kummanam Rajasekharan chuan cancer natna tihbaiawm tak chungchang leh a pumpelh dan inzirtirna chu hna pawimawh bik a ni a ti a. Mizoram tan ngat phei chuan state dangte aiin a pawimawh lehzual tih a sawi a. “Cancer chungchang, a lo lan chhuah dan te, inenkawl dan te leh a inven dan te chu Mizo mipuiten kan hriatthiam zawngin a tawngkam tluangtlam zawk thlenga inzirtir uar zawk kan mamawh tawh a. Mi tam zawkten cancer hi a stage hmasa lama hmuh chhuah chuan a la tihdam theih a ni tih an hriat a; mahniin cancer vei leh vei loh an inhriat dante pawh zirtir sauh sauh a tul tak zet a ni,” a ti bawk.   Thusawitu dang Lok Sabha MP CL Ruala chuan, "Sawrkar pawhin theih tawp chhuahin State Cancer Institute pawh phuisui zawkin a din tawh a ni,” tiin a sawi.   Conclave-ah hian hmarchhak biala State tinte leh State pakhat bika cancer hluar zualte ngun taka sawiho leh chhuiho a ni a. Mizoramah chuan pumpui cancer a hluar bik a, khawvel pum huapa pumpui cancer tamna Japan nena inangkhat a ni. Hei hi mi thiamte chuan tuibur, sahdah, vaihlo zuk chi, vaihlo hmuam leh thial chi, kuhva bakah sarep leh chawhmeh rep ei leh chin luat vangah an puh a ni.   Conclave-ah hian phai lama doctor thiamte leh Mizoram doctor thiam tak takten hun then 4-ah cancer chungchanga thupui then hrang hrang uluk taka thlur bingin sawihona neih zui a ni.