Aizawl May 2, 2024 : Vaihlo do kawnga National Health Mission hnuaia hmalatu National Tobacco Control Programme (NTCP), Mizoram te chuan Refresher Training cum Review Meeting chu ATI-ah nei in hun an hmang a, cancer natna zinga 30% leh NCD nei zinga 30% te chuan vaihlo zuk leh hmuam hmang thin te an ni tih ngaihthlak a ni.

National Health Mission Drector Dr. Eric Zomawia chuan NTCP hmalakna hrang hrang te a la hlawhtling vek rih lo a nih pawhin tih dan dangte hmanga hma lak chhunzawm a tangkai thu leh Vaihlo dona kawngah pawh chhungkua atanga hmalak a pawimawh thu a sawi. Inkaichhawntheihloh natna - Non Communicable Disease (NCD) te thlen theitu langsar ber chu Vaihlo zuk leh hmuam hmang a nih thu a sawi a; cancer natna zinga 30% leh NCD nei zinga 30% te chuan Vaihlo zuk leh hmuam an hman thin thu a sawi bawk.

He hun hi National Tobacco Control Programme (NTCP) State Nodal Officer Dr. H. Lianthangpuia chuan kaihruaiin, NTCP ten vaihlo dona kawnga hma kan sawn zel theih nan Kohhran hrang hrangte nen a thawhho a pawimawh thu leh thawhho pui tur a hma an lakna te a sawi a ni.