Khawvela film festival lar leh ngaihhlut hlawh ber tih ngam Cannes Film Festival chu Cannes, France-ah neih mek a ni. He film festival hi May 14, Thawhlehni atang khan tan ani a, May 25 (Inrinni) thleng a awh dawn a ni.  

Cannes Film Festival hi kum 1946 atang daih tawha hman tan kha niin, kumin hi a vawi 77-na a ni. Khawvel hmun hrang hrang atangin film lama hriat hlawh ber berte an fuankhawm thin a, nikum khan he festival hi Mizoram atangin mi pahnihin an lo zuk chhim ve tawh bawk a ni. 

American filmmaker Greta Gerwig chu jury president a ni a, French actress Camille Cottin chuan a host thung. French comedy-film 'The Second Act' chu festival khun hawn nan show a ni a, film show zingah hian 'Furiosa : A Mad Max Saga' chuan ngaihhlut a hlawh hle. Anya Taylor-Joy, Chris Hemsworth, Alyla Browne leh Tom Burkete channa film hian entu mipui a tilawm hle a, minute ruk chhung zet standing ovation an dawng nghe nghe a ni.  

Sawisel hlawh Aishwarya Rai 

Bollywood superstar hi amah vanga sawisel hlawh a ni lo a, a thawmhnaw hak design saktute vang zawka sawisel hlawh a ni. Cannes Film Festival-ah hian a fanu Aaradhya Bachchan nen an tel a, media te ngaihven ber pakhat an ni. 

A tirah a chet sual avangin a chanchin hi media lamah a darh a, a ban a awrh lai thlalak pawh hmuh tur a awm. Mahse a inhliamna lutuk lo a nih hmel a, Ningani khan red carpet a zawh ve leh thei a ni. 

Red carpet-a a thawmhnaw inbel hi a mawipui lutuk lo a ni mai thei a, a fan thenkhat phei chu an thinrim hle. A designer te nasa takin an dem a, tawngkam na tak tak hmangte pawh an awm nawk a ni.