- Squadron Leader H.L.Risanga Chaltlang ‘N’/Lily Veng 1. KEIMAH: Squadron Leader HL Risanga ka ni a, Indian Air Force (IAF)-ah January 2009 khan Aeronautical Engineering Officer ni tura commission ka ni a, Guided Weapons (Missile System) a specialist ni tura train ka ni. Tunah hian IAF-a Missile Training Institute-ah Instructor-a post mek ka ni. Zirna lamah chuan Bachelor of Engineering (Comp Sc) Coimbatore Institute of Technology atang kum 2008 khan ka graduate a, ka graduation atang rei vak lo hnuah IAF hi ka zawm ta ani. 2. ARTICLE KA ZIAH CHHAN: Thalai naran ve tak anga Matric zawh hnua hmalam kawng zawh tur baihvai ve thin tak ka ni a, tumah min guide tur nei lem loin thiante leh chhungte nawrna avangin class XI atang chuan Science ka zir ve ta ringawt a. Chu ka zir chuan engnge mi thlen dawn tih pawh chu ka hre ngai reng reng lo. Class XII ka han zawh hnu chuan thiante tih ang angin Mizoram sorkar buatsaih Technical Entrance Exam ka pe ve a, chumi azarah chuan Engineering ka lo zir thei ta a. Pathian khawngaihna zarah Engineer chu ka lo ni ve ta a, hna thawh tur ber pawh hre lo chuan a rem rem ka thawk kual a, thla 1/2 hna vel te te. Tuk khat chu ni tin chanchinbu pakhatah hian IAF chu Pachhunga University College-ah Selection nei turin an rawn kal dawn tih chu a rawn chhuah a. Ka hna thawhpui, ka thianpa chu sawmin kan hna atang chawlh a thlawn loh nan tiin leave la chuan kan va kal ve ta tawp a. Exam kha mi 11 vel chauh kan ni a. Selection exam leh Group Discussion te min neihpui hnu chuan ka thianpa nen chuan a thlante zingah kan tel ve ta a. Khatia kan tling ve kha kan duhtawk viau a, a hnua Interview leh selection process dang hmachhawn tur chuan kal pawh chu kan tum lem lo. Vanneih asiamin, thlante zingah khan Military lama tui deuh pakhat hi a lo tel ve a, ani chuan kal turin min sawm a (Varanasi a kal tur a ni a). Ka thianpa erawh chuan a peih ta lo. Tichuan, Varanasi-a Air Force Selection Board (AFSB) pan chuan kan kal ta a. Chutah chuan Services Selection Board (SSB), kar khat awh chu kan va hmachhawn ta ani a. Heta ka thlen thlak chiah hian eng nge Military Officer ni tura selection process hi a nih tih hi ka hre ve chauh a. Military leh Para-Military pawh hre hrang ngai lo kha ka ni thin a, Military background engmah nei hek lo chu. Ka beiseina sang ber chu he article hian ka thalaipuite, zirlaite leh chhungte tan Military Career lamah awareness a lo siam a (ka bo thin ang em ema bo lo a), eng emaw chen tala guide a lo nih theih takin tiin ka rawn ziak ve a ni. 3. KA VEI VE: Kan state-ah career lama awareness a that tawk lohzia chu a taka tawngtute zinga mi ka nih ka inring a, tu han dem vak tur pawh chu an awm chuang lo a, kan state la naupan vang pawh a ni mahna. Awareness kan tlakchham avang hian zirlaiten kan zir zawh hian hna zawnah kan ngampat loh phah niin ka hria a. Chuvang chuan Post Graduation leh zirna sang zawkte, tum lutuk nei lem loin kan zir ni hian ka hre thin. Tum nei lutuk lem lo, exam pass tur ngawr ngawra lo zir hian zirlaite rilruah hma lam hun tur atan tumruhna a lo siam lo khawp mai. Thiamna lamah kan tlin loh vang erawh a ni hauh lo a, kan hriat tawk loh vang a ni ber. College ka kal lai pawhin Mizote kha Tamil Nadu-a Engineering College tha ve ber zinga thiam zual Top 10-a lang pha kha an awm ve reng. Chutiang bawkin hmun dang dangah pawh Mizo zirlai thiam filawr kha an awm ve reng bawk. 4. TUNGE INDIAN AIR FORCE OFFICER CHU? Indian Army, Indian Air Force leh Indian Navy te hian kan ram Armed Forces (Military) te chu a siam a, Ministry of Defence hnuaia awmin Supreme Commander atan ‘President of India’ hi kan Constitution-in a dah a ni. Heng Force 3-te hi mawhphurhna hran theuh pek an ni a, chung zingah chuan kan ram ‘Air Defence’ mawhphurhna chu IAF hi pek an ni. Tin, chu mawhphurhna hlen tur chuan Aircraft, Missiles, Radars leh a kaihhnawih thil dangte a hmang ani. IAF hi a hnawthawh kawngah a khairualin ‘Branch’ pathum-ah then ani a, chungte chu: a) Flying Branch i. Pilot ii. Navigator b) Aeronautical Engineering Branch i. Electronics ii. Mechanical c) Ground Duties Branch i. Administration (Air Traffic Controlling, Fighter Controlling & General Administration) ii. Logistics iii. Accounts iv. Meteorology v. Education Heng Branch hrang hranga specialize tura thlan chhuah mi (Graduate chin)-te chu IAF-in a train hnuah Officer nihna (Commissioned Rank) Supreme Commander kaltlagin a pe a ni. 5. ENGTIN NGE IAF OFFICER KA NIH THEIH ANG? IAF Officer ni tur chuan Exam paltlang phawt a ngai a, chu exam chu UPSC leh IAF hian a hran ve vein a buatsaih thin a ni. UPSC buatsaih exam hi Air Force tan chauh ni loin, Tri Services te tan a ni. Chungte chu: a) National Defence Academy (NDA) b) Combined Defence Service (CDS) Tin, he UPSC exam hi Flying Branch Officer ni tur tan chauha buatsaih a ni. IAF-in a buatsaih exam hi Air Force Common Admission Test (AFCAT)tia vuah a ni a, he exam erawh chu Branch zawng zawng tan buatsaih a ni. Heng exam te hi kumtin vawihnih buatsaih ziah a ni bawk. 6. ENG ngE IAF OFFICER NIH CHU A THATNA? Indian Army leh Indian Navy ang bawkin Indian Air Force Officer rank hi Group ‘A’ Gazetted Officer rank a ni a, tunah tak phei chuan central service-ah chuan pension hmu awm chhun a ni. Kum 20 service hnuah Pension nen a retire theih. Tin, tun hma a la awm ngai lo, One Rank One Pension (OROP) te pawh Military service-te tan hman a ni tan tawh. Tun kum atanga hman tak 7th Pay Commission-ah pawh khan Military service tan tha thawkhat takin hlawh siamsak a ni bawk (hlawh tan nan Rs. 70,000 – Rs. 80,000 bawr vel). Training tan ni atangin Stipend hi Rs. 21,000/- Cadet zawng zawngte pek an ni a, training an zawh ni chiah hian hlawh pangngai an dawng nghal a ni. 7. A TAWP KHAR NAN: Ram Armed Forces tana pawimawh ber pakhat chu mahni ram siamchhuah ngei (indigenised) ralthuam hman hi ani a. Tin, tun hnai lawk atang khan hei hi nasa lehzual a ngaih pawimawh a ni. Tun thleng kha chuan ram dang atanga ralthuam lei nasa ber ram kan ni a, hetia kan ramin rahbi thar hemi kawnga a han kai turah hian ka thalaipuite hi tel ve turin ka duhsak hle. Thla hmasa (June) lawk khan IAF chuan hmasawnna, kawng hrang hrangah a chuangkai a. Hmeichhe Jet Fighter pilot hmasa ber tur 3-te a thlang a, India siam Jet Fighter (Tejas) chu IAF hnenah a hlan a, Israel nen tangkawpa an missile siam MR-SAM (70Km chhunga target kapthla thei)-te chu hlawhtling taka kah chhuah a ni bawk. Tunah hian IAF officer tanglai mek hi 4 chauh kan ni a, kan la beitham hle. Chhungkaw dinhmun inan loh avangin mahni state chhuahsana hnathawhte pawh thil har a ni mahna. Chutiang a nih loh chuan ka thalaipuite ka cho duh che u a!! Mahni state chhunga awlsam leh hahdam taka thawh theih sorkar hna ngawr ngawr zawng loa he khawvela kan awm chhunga thil pawimawh tak ‘mahni zahawmna’ (REPUTATION) tihpun theihna hna hi in thatlai ngeiin thawk turin ka sawm duh che u ani. Military service hi eng ram pawhina a chawimawi leh a ngaihhlut ani a, hna zahawm (REPUTED) ve tak a ni. Tumna neih chuan theihnain a rawn umzui thin. In hma lam hun tur in siamna kawngah ka duhsakna ka hlan theuh a che u. “Thil tithei nia i inhriat tlat chuan i tithei ngei ang a, ti thei lo nia i inhriat tlat thung erawh chuan i tithei lo ang,” - Henry Ford