Aizawl August 26, 2024 : Mizoram sawrkarin casual teacher a lak thar zinga mi 354-ten an hna an zawm duh lo.

Assembly session neih zawh taka ziaka chhan chi zawhna, School Education Minister Dr. Vanlalthlana chhanna atanga a lan danin casual teacher hna zawm duh lo hi high school-ah 68, middle school-ah 138 leh primary school-ah 148 an awm.

School education minister chuan casual teacher atan hian mi 1,369 lak an ni tih sawiin hengte hi high school tan 350, middle school tan 374 leh primary school-a thawk turin 648-te an ni tih a sawi a. Zirtirtu ai kal ruaite chuan sawrkar thu angin an titawp vek tawh a; mahse, natna khirh tuar mek mahni post-a awm thei lote an awm tih sawiin hengte hian ai kal la tawh lovin an leave neih ang angte an lak chhunzawm niin a sawi bawk.

Minister chuan, “Casual teacher lak dawnah school hrang hrangah zirtirtu indaih tawk turin a mamawhna school-te zirchian hmasak a ni a, hemi mil hian a theih chin chinah posting hi siam a ni,” a ti bawk.

Sawrkar chhinchhiah danin kum 2023-24 khan high school zirlai 15,161, middle school zirlai 36,386 leh primary school zirlai 51,876 an awm a ni.