Central YMA chuan cement mistiri leh ‘floor tile’ phah zirna hun bik a buatsaih thin a, ‘training’ hnuhnung ber pualin hmanni lawk khan kharna hun an hmang nghe nghe. CYMA atanga cement mistiri zirchhuak an awm nual tawh a, tam takin eizawn nan an hmang tawh a, Mizo cement mistiri kan neih phah a, duhthusam diak diakin hlawhtling vek lo mahse hlawhtling tam tak an awm zel a. CYMA atanga mistiri zirchhuak pakhat chuan a chenna khuaa RCC in ding tam zawk chu amahin a sa a ni awm e. Tuna ‘tile’ phah zir hi CYMA-in vawi khat a huaihawtna a ni a; a mihringa zir chu ni mah se tun tuma zirchhuakte kuthnu tlangpui hian he zirna quality hi a pholang dawn a ni. CYMA-in ‘tile’ phah zir a buatsaih hi Labour and Employment Department chuan suma a puih bakah zir chhuakte chu ‘tile’ zaina hmanrua tha tak a thlawnin department chuan a pe a, an fakawm e. Cement hna khawih chungchang hi kan khel ve ta nual a, ram tam takah pawh leilung fate zawkin hna hram leh hniam deuh nia ngaih an thawk duh lo fo thin a. Hetiang hian ram hausaah remchang zawngin Mizo hnathawk an awm thahnem ta hle a; thenkhat chuan heta an tih that duh lohte chu hmun dangah eizawn nan an hmang leh ang lawi si ! Hnam hmangaihna rilru atang chuan leilung fate hian kan rama hna awm apiang an chang tur a ni a. Ram hmangaihna tel miah lo pawh nise ram dang mi rawn awmte’n eizawn nana an hman theih chu leilung fate tan ei a tling tur a ni. Tharum hmangin hnam dang mite hnawhchhuah theih an ni lo a, hnathawh tur kan pek chhung chu kan ramah an awm tho tho ang. Tunhma chuan lumeh hi hnam dang tih tura dah thin a ni a, kan tlangvalte eizawn nan a tlak rin a ni a, Mizo mipa thenkhat chu luhchilhtir niin vawiinah chuan lumet hi eizawnna tha tak a ni tawh a ni. Hnam dang lumet te kha nawr chhuah luih an ngai hauh lo a, zawi zawiin an kiam mai a ni. Cement mistiri leh ‘tile’ phahah hian sawrkar leh CYMA hi tangkawp zel sela a tha ang. CYMA atang hian cement mistiri training chhuak tam tak an awm tawh a, chhawr thlak tak tak an awm ang, chuti chung chuan hnam dangte’n rawih an hlawh zawk tlat hi ngaihtuah chian a pawimawh khawp mai. Eizawnna thu hmun, thiam inchen rau rauah sulhnu a inpawr hleih a nih chuan eizawnnaa hlawhchhamna lam aiin hringnuna hlawhchhamna a kawk zawk e. Mizo mistiri nih vanga inruai loin, ‘hna thiam leh uluk mistiri’ an nih vangin inruai zawk ang u. CYMA hian eizawnna tlak zirna a pe zel dawn a nih chuan a zirte’n thiamna (skill) sang tak an neih theihna turin tan la zual sela. Mistiri tam deuh thiam fumfe lo ai chuan tlem zawk mah se ‘quality’ nei thate chu rawih an manhla ang. CYMA atanga cement mistiri zirchhuak te chu mistiri dang aia thiam zawk ‘branded’ anga ngaih burna mipuiah a awm theihna tur law law-in tan lak ni thei se a va duhawm em!