Aizawl: Mizorama mistiri hrang hrang te chu an thiamdan mila grade ah then a, an hlawh pawh an grade mil zela bituk sak tum a ni.

ZALEN thudawn danin tunhnai khan mistiri te thiamna chungchang leh an hlawh chungchang hi Chief Secretary Lalnunmawia Chuango hovin mi pawimawh ten an sawiho a, Mizorama Mizo leh hnamdang cement mistiri te chu an thiam dan tehfung siamin an grade pawh siamsak a, an grade mil zela hlawhbi pawh tuk sak nise an ti. 
   

Meeting-ah hian Mizorama cement mistiri indaihlohna leh a phuhruk dan tur te sawi ho a ni a, hnamdang cement mistiri te hlawh bi mumal lo lutuk leh insatu mipui ten an pawisa sen phu ang ngeia hna tha leh mawi an hmuh theihna tura ruahmanna siam dan turte an sawi ho a ni. Cement helper senior deuh ten mistiri an inti ringawt zelte chu tha an ti lova, tehfung siam a tul thu te sawi a ni bawk.
   

Chief Secretary hova thukhawm chuan cement mistiri te chu an thiam dan (skills) tehfung siamsakin mistiri grade I, grade II leh grade III bakah helper te chu skills certificate siamtir nise an ti a, certification hi State Council of Vocational Training in an siam dawn a ni. 
   

Meeting-ah hian cement mistiri ten sum hlawk taka siam nana theka a thawh an phut luih tlat thin tihbo a tul thu sawi a ni a. Hetianga thil an ti zel dawn a nih chuan Contract Act anga chhiah (tax) an chawi ve theih dan a awm reng thu Chief Secretary Lalnunmawia Chuaungo chuan a sawi a ni. 
   

Mizo thalaite chu a tam thei ang ber cement mistiry training tir tul an tih thu leh tlema a thluak nei zawk te chu Construction Supervisor course siamsak a, vai mistiri te hotua an tan theih dan turte sawi ho a ni bawk a. LESDE hnuaiah CYMA leh mi thiam bikte nen supervisor training tam thei ang ber buatsaih nise, an ti bawk. 
   

ZALEN zawh-na chhangin Labour, Employment & Skill Development department hotute chuan mistiri hlawh bituk leh grade siam chungchangah hian hmalak mek a ni tih an sawi a. "Kan department chuan hlawh hniam ber (minimum wages) hi kan bituk thei a, mahse a sang lam hi chu kan bithliah theih a ni lova. Skill development lamah Mizo thalai a tam thei ang ber training tir tumin hma kan la mek a, supply hi a tam thei ang ber neih kan tum a ni," an ti. Grade siam chungchangah chuan LESDE department chauh ni lovin PWD te nen inrawn tlanga hmalak a ngaih tur thu an sawi bawk.